Öz fəsadları ilə dünyanın bütün qitələrində günün mühüm mövzusuna çevrilən qlobal istiləşmə alimlərin və təbiətsevərlərin bir çox məsələlər barədə həyəcan zəngi çalmasına səbəb olur.
Təbiətşünas alimlər Xəzərin şimal sahillərində – Volqa çayının deltasında hər bahar minlərlə insanın qəlbini və gözünü oxşayan Xəzər lotosu üçün də həyəcanlı dövrün başlandığını qeyd edirlər. Mütəxəssislərin fikrincə, Şimalda buzlaqların əriməsi Volqanın sululuğunun artmasına səbəb olsa da, bu fakt deltanın florasının sabahı üçün ümidverici proqnozlar yarada bilir. Ancaq ümidlər nə qədər böyük olsa da, əminlik üçün əsas deyil.
Çünki Volqa çayı Rusiyanın sənaye, gəmiçilik, enerji və ən mühüm su yollarından biridir.Yəni bu çayın illərdən bəri çirklənməsi şəksizdir. Hətta belə rəylər var ki, deltanın ekosistemi süniləşir. Ona görə də həmin ərazinin florasını çətin günlər gözləyir. Aydın məsələdir ki, Xəzər lotosu dənizin digər sahillərində yetişə bilməz. Ona mütləq şirinsulu sahillər lazımdır. İnanırıq ki, iqlim dəyişiklikləri bu təbii gözəli soldura bilməyəcək.
İldırım İSMAYIL, “Xalq qəzeti”