Altı illik fasilədən sonra Brüsseldə Türkiyə ilə Avropa İttifaqı arasında Yüksək Səviyyəli İqtisadi Dialoq toplantısı keçirilir. Məlumatı “Anadolu” verib.
Bu gün səhər saatlarında Avropa Komissiyasının Brüsseldəki mənzil-qərargahında başlayan toplantıda Türkiyənin maliyyə və xəzinə naziri Mehmet Şimşək, Avropa İttifaqının iqtisadi komissarı Valdis Dombrovskis və AB-nin genişlənmə üzrə komissarı Marta Kos da daxil olmaqla bir sıra yüksək səviyyəli rəsmilər iştirak edib.
İclasın birinci hissəsində Türkiyə və Aİ-nin makroiqtisadi görünüşü, rəqabət qabiliyyəti sahəsində atılacaq addımlar və struktur islahatları müzakirə olunacaq. Bu sessiyalara nazir Şimşek və komissar Dombrovskis həmsədrlik edəcəklər.
İkinci hissədə Türkiyə və Aİ işgüzar dairələrinin aparıcı nümayəndələri birgə investisiya və ticarət imkanlarını qiymətləndirmək üçün nazirlər və komissarlarla görüşəcəklər.
Görüşlərdə həmçinin Avropa İnvestisiya Bankı, Avropa Yenidənqurma və İnkişaf Bankı və Avropa Şurasının İnkişaf Bankı kimi Avropa maliyyə institutlarının yüksək vəzifəli rəhbərləri də iştirak edəcəklər.
Görüşlər çərçivəsində nazir Şimşekin Dombrovskis və Kos ilə ikitərəfli görüşləri də gözlənilir. Görüş iki tərəf arasında iqtisadi əlaqələrin möhkəmləndirilməsi və strateji əməkdaşlığın dərinləşdirilməsi baxımından böyük əhəmiyyət kəsb edir.
Türkiyə ilə Aİ arasında Yüksək Səviyyəli İqtisadi Dialoq toplantısı bundan əvvəl 2016, 2017 və 2019-cu illərdə keçirilib.
P.ƏMİRCANOV
XQ
