Birləşmiş Ştatlar “son saatlarda” üsyançı husilərin nəzarətində olan Yəmən ərazilərinə 36-dan çox aviasiya zərbəsi endirib.
AZƏRTAC xəbər verir ki, bu barədə “Al Masirah” telekanalı husilərinin hərbi nümayəndəsi Yəhya Sariaya istinadla məlumat yayıb.
“Son saatlar ərzində Amerika ölkəmizə qarşı açıq təcavüz edib, Səna, Səada və digər əyalətlərin bir sıra ərazilərinə 36-dan çox hava hücumu həyata keçirib. Zərbələr nəticəsində çoxlu sayda insan ölüb və yaralanıb”, - deyə hərəkatın nümayəndəsi bildirib.
Yəmən husiləri isə hücumlara cavab olaraq ABŞ-ın Qırmızı dənizdəki hərbi gəmilərini hədəfə alırlar. Belə ki, dünən raket və pilotsuz uçuş aparatlardan istifadə edilməklə Amerikanın təyyarədaşıyan gəmisinə və onu müşayiət edə gəmilərə üç hücum həyata keçirilib.
