Ukrayna ABŞ-ın Vaşinqtona ölkənin mineral ehtiyatlarının payının verilməsinə dair razılaşmanın bir hissəsi olacaq 500 milyard dollarlıq fond tələbini rədd edib.
“European Pravda” yazır ki, bu barədə "Bloomberg"ə ABŞ-la danışıqların gedişi ilə tanış olan ukraynalı məmur bildirib.
Bu fond ABŞ-a Rusiyanın təcavüzü ilə mübarizə üçün verdiyi yardımı kompensasiya edəcəkdi. Anonimlik şərti ilə agentliyə mənbə bildirib ki, Ukrayna ayrılan yardımın faktiki məbləğinin təxminən beş dəfə az olduğunu və 90 milyard dollardan çox olduğunu iddia edir.
Danışıqlarla tanış olan başqa bir şəxs deyib ki, tərəflərin sazişi yekunlaşdırmaq üçün daha çox vaxta ehtiyacı var, çünki ABŞ-ın təklif etdiyi hazırkı layihə bəzi şübhəli elementləri ehtiva edir və Ukrayna prezidenti Vladimir Zelenski bunu təsdiqləməyə hazır deyil.
ABŞ prezidenti Donald Tramp Zelenskiyə razılaşmanı qəbul etməsi üçün təzyiq edir. Şənbə günü o, iki ölkənin razılaşma əldə etməyə "çox yaxın" olduğunu söyləyib.
ABŞ-ın maliyyə naziri Scott Bessent şənbə günü Financial Times qəzetində yazıb ki, saziş Kiyevdə hökumətin təbii ehtiyatlar, infrastruktur və digər aktivlərdən əldə etdiyi gəlirlərin Ukraynanın uzunmüddətli yenidən qurulması və inkişafına yönəlmiş fonda yönəldilməsini nəzərdə tutur.
Bessent yazır ki, bu, özəl investisiyaları cəlb etmək üçün lazım olan şəffaflığı, hesabatlılığı və korporativ idarəetməni təmin edəcək.
"Gəlin bunun nə olduğunu da açıqlayaq. ABŞ Ukraynadakı fiziki aktivlərə sahib çıxmayacaq. Ukraynanı daha çox borcla yükləməyəcək", - Bessent yazıb.
Zelenski bu ayın əvvəlində Vaşinqtonun ilkin təklifini rədd etdikdən sonra Ukrayna rəsmiləri bu həftə Kiyevə səfəri zamanı ABŞ-ın xüsusi elçisi Keith Kellogg ilə potensial mədən sazişini müzakirə ediblər.
Ukrayna rəsmisi bildirib ki, ABŞ-dan gələcək hərbi və maliyyə yardımına zəmanətin olmaması danışıqlarda əngəl olaraq qalır.
Bu həftənin əvvəlində "Bloomberg" televiziyasına verdiyi müsahibədə Bessent deyib ki, mineral sövdələşmə Trampın Ukraynanı iqtisadi əlaqələr vasitəsilə ABŞ-a bağlayaraq müharibəni bitirmək planının əsasını qoyacaq və bununla da təhlükəsizlik qalxanı olacaq.
S.ELAY
XQ
