Böyük Britaniyanın səhiyyə naziri Ues Stritinq süd vəzi xərçənginin daha erkən aşkarlanmasına kömək edəcək yeni bir sınaq layihəsinin başladığını elan edib.

AZƏRTAC “The Independent”ə istinadla xəbər verir ki, layihə hər il bu xəstəliklə diaqnoz qoyulan on minlərlə qadına kömək etmək potensialına malikdir. Bu sınaqda ölkə üzrə 30 test mərkəzində 700 minə yaxın qadın iştirak edəcək. Süni intellekt texnologiyası radioloqlara mammoqrafiya müayinələri zamanı süd vəzi toxumasındakı dəyişiklikləri müəyyən etməyə kömək edəcək ki, bu da xərçəngin mümkün əlamətlərini daha erkən aşkar etməyə imkan verəcək.

Hazırda mammoqramlar üçün iki radioloqun təcrübəsi tələb olunur. Lakin Böyük Britaniya Səhiyyə Nazirliyi bildirib ki, bu yeni AI (süni intellekt) texnologiyası sayəsində yalnız bir mütəxəssis müayinə prosesini təhlükəsiz və effektiv şəkildə apara biləcək. Əgər sınaq uğurlu alınarsa, radioloqlar və digər mütəxəssislərin daha çox test aparmasına şərait yaradacaq və bu da gözləmə siyahılarının azalmasına kömək edəcək.

Aytən Abbaslı

AZƏRTAC-ın xüsusi müxbiri

London