Gürcüstan “ikinci cəbhə”yə çevriləcək 

2024-cü ilin payızında keçiriləcək parlament seçkilərində müxalifətdəki “Vahid Milli Hərəkat”ın qələbəsi Gürcüstanı bir neçə gündən sonra “ikinci cəbhə”yə çevirəcək. Bu barədə Gürcüstanın Baş naziri İrakli Kobaxidze bildirib.

O, aparıcı müxalifət partiyalarını və onların tərəfdarlarını “radikal müxalifət” adlandırıb. İ.Kobaxidzenin sözlərinə görə, müxalifət Gürcüstanda vəziyyəti gərginləş­dirməklə, inqilab təşkil etməklə hakimiyyət dəyişikliyinə çalışır. Bu isə ölkəni mühari­bəyə sürükləyəcək: “Nəzəri olaraq, “Vahid Milli Hərəkat”ın seçkilərdən sonra hakimiy­yətə gələcəyini təsəvvür etsək, mən sizə zə­manət verirəm ki, bir neçə aydan sonra deyil, bir neçə gündən sonra Gürcüstan “ikinci cə­bhə”yə çevriləcək”.

Baş nazir qeyd edib ki, o, əlində olan mə­lumatlara əsaslanaraq buna zəmanət verir, bu barədə isə ictimaiyyətə danışa bilməz: “Təəs­süf ki, ictimaiyyət məlumatların çox azını bilir. Biz müəyyən məlumatları açıq şəkildə paylaşmırıq. Hazırkı reallığa, münasibətlərə diqqət yetirmək hələ də vacibdir. Bu səbəb­dən müəyyən məlumatları, o cümlədən bəzi görüşlər barədə açıqlama vermirik”. 

İ. Kobaxidze ölkədə proseslərin analoji şəkildə inkişaf etməyəcəyinə əmindir: “Ok­tyabrın 26-da keçiriləcək seçkilər müharibə ilə sülh, liberal faşizmlə ənənəvi dəyərlər, Gürcüstanın qaranlıq keçmişi ilə ölkənin par­laq, Avropa gələcəyi arasında bir növ referen­dum olacaq. Biz əminik ki, “Gürcü arzusu” seçicilərin, təxminən, 60 faizinin dəstəyini qazanacaq. Bu səbəbdən də müxalifətin seç­kilərdə qalib gəlmək şansı yoxdur. Çünki gürcü xalqı, ilk növbədə, ölkənin maraqlarını müdafiə etməyə sadiqdir”.

Baş nazir ABŞ Konqresinin Gürcüstan hakimiyyətini “xarici agentlər” haqqında qa­nunun qəbuluna görə tənqidinə də münasibət bildirib: “Konqresdə belə bir qiymətləndirmə Gürcüstanla bağlı praqmatik mövqenin hələ formalaşmadığını göstərir. Biz Gürcüstan dövlətinə qarşı ədalətsiz hücumlar gördük. Konqresdə səslənən tənqidlərin heç bir əsa­sı yoxdur. Amerikalı tərəfdaşlarımıza fərqli gündəm təklif etmək istəyirik, bu, sıfırlama deməkdir. Bunun fonunda gürcü-amerikan münasibətləri yenidən qurulmalıdır”.

Kobaxidzenin fikrincə, münasibətləri bərpa etmək üçün, ilk növbədə, ədalətli ya­naşma lazımdır. Gürcüstan bunun üçün lazım olan maksimum sayda addımı atacaq. Əsas odur ki, ABŞ hakimiyyətinin nümayəndələ­ri də belə addımlar atsınlar. Onun sözlərinə görə, Avropa İttifaqı (Aİ) da yaxın gələcəkdə Gürcüstanın bu quruma üzvlüyü ilə bağlı da­nışıqlardan imtina etməyəcək. 

Hazırda Gürcüstan Aİ-yə üzv olmağa namizəd ölkədir. Ölkə bu statusu 2023-cü ilin dekabrında, Ukrayna və Moldovadan bir il sonra alıb. Gürcüstana həmçinin Aİ-yə daxil olmaq üzrə danışıqlar mərhələsinə keçmək üçün 9 şərt verilib. Onların arasında qütbləşmənin aradan qaldırılması, oliqarx­sızlaşma, azad və rəqabətli seçkilərin təmin edilməsi və s. var. “Bu, gürcü xalqı ilə bağlı verilən qərardır, yəni, gürcü xalqına namizəd statusu veriblər. Mən əminəm ki, onlar da­nışıqlara başlamaqdan imtina etməyəcəklər. Əgər başqa cür olarsa, o zaman məlum olur ki, gürcü xalqına qarşı yanlış münasibət var. Məsələn, Moldova siyasi və media plüraliz­mi sıfır olan MDB üzvüdür. Demokratiya, korrupsiya baxımından ciddi problemləri var. Belə bir vəziyyətdə Moldova ilə danışıqlar davam edir. Amma bizimlə yox, bu, böyük ədalətsizlikdir”, – Kobaxidze bildirib. 

Onun sözlərinə görə, belə ədalətsizliyi Aİ və Gürcüstanın fərqli maraqları ilə izah et­mək olar. “Maraqlar dəyişən kimi, Gürcüsta­na yanaşma da dəyişəcək və danışıqlar açıla­caq”. Gürcüstanın Baş naziri əmin olduğunu bildirib ki, 2030-cu ilə qədər namizəd ölkələr arasında Gürcüstan Aİ-yə inteqrasiyaya ən yaxşı şəkildə hazır olacaq və bu istiqamətdə addımlar atmağa davam edəcək.

İ.Kobaxidze daha sonra bildirib ki, Aİ və ABŞ-nin özünün oliqarxsızlaşmaya ehtiyacı var. Eyni zamanda, baş nazir qeyd edib ki, Gürcüstan hakimiyyəti son iki-üç il ərzində Qərb tərəfdaşlarının – Avropa və Amerika institutlarının gürcü xalqının gözündə müs­bət imicini qorumaq üçün mümkün olan hər şeyi edib. 

Xatırladaq ki, Gürcüstanın Aİ ilə münasi­bətləri 2024-cü ilin yayından pisləşməyə baş­layıb. İyulun 9-da Aİ səfiri Pavel Qerçinski bəyan edib ki, Aİ liderləri Gürcüstan Müda­fiə Nazirliyi üçün ayrılan pulu verməyəcək. Üstəlik, hökumətə birbaşa maliyyə dəstəyini azaldacaq. Həmin vəsait isə QHT və medi­aya yönəldiləcək. O, bu qərarı Gürcüstanda “Xarici təsirin şəffaflığı haqqında” qanunun qəbulu və anti-Qərb ritorikası ilə izah edib. Bundan əlavə, Aİ Gürcüstanın birliyə qoşul­ması prosesini dayandırmaq qərarına gəlib.

Bu arada Gürcüstanla bağlı daha bir xəbər mətbuatın marağına səbəb olub. Mə­lumatda bildirilir ki, “Gürcü Arzusu” parti­yasının qurucusu Bidzina İvanişvilinin prezi­dentliyə namizədliyi irəli sürülə bilər. Bunu jurnalistlərə açıqlamasında ədliyyə naziri Rati Breqadze deyib. “Əgər İvanişvili pre­zidentliyə namizədliyini irəli sürməyə qərar verərsə, əminəm ki, o, Gürcüstan tarixində ən yaxşı prezident olacaq”.

Qeyd edək ki, parlamentar respublika olan Gürcüstanda prezident xalq tərəfindən birbaşa seçilmir. Oktyabrda keçiriləcək par­lament seçkilərindən sonra yeni prezident 300 nəfərdən ibarət parlament üzvləri və re­gionların təmsilçiləri tərəfindən seçiləcək.

Pünhan ƏFƏNDİYEV