Ukrayna ilk dəfə olaraq Rusiya ərazisinə hərbi təyyarədən hücum edib. Bu barədə Sky News Ukrayna hərbi mənbəsinə istinadən yazır.

Britaniya telekanalının həmsöhbətinin sözlərinə görə, Belqorod vilayətindəki “Rusiya komandanlığı” atəşə tutulub.

“Zərərin qiymətləndirilməsi hələ də davam etsə də, birbaşa zərbə təsdiqlənib. Bu, Ukrayna Hərbi Hava Qüvvələrinin Rusiya ərazisindəki hədəfə havadan atdığı ilk sursatdır”, - mənbə Sky News-a bildirib.

“Ashes” teleqram kanalının daha əvvəl xəbər verdiyi kimi, Ukrayna Silahlı Qüvvələri Belqorod vilayətinin Rakityanski rayonundakı sursat anbarına hücum edib. Zərbədən sonra yanğın başlayıb. Yayımlanan videolarda partlayış səsləri eşidilir.

Belqorod vilayətinin qubernatoru Vyaçeslav Qladkov teleqram kanalında yanğının qeyri-yaşayış binasında baş verdiyini bildirib. Rayon rəhbəri qeyd edib ki, xəsarət alan olmayıb. “Biz indi yaxınlıqdakı evlərin sakinlərini təhlükəsiz məsafəyə daşıyırıq. Rakityanski rayonunun rəhbəri Anatoli Klimov və əməliyyat xidmətləri yerindədir”, - qubernator bildirib.

Rusiya Müdafiə Nazirliyi Moskva vaxtı ilə saat 13:40, 14:00 və 14:20-də Belqorod vilayəti üzərində pilotsuz təyyarələrin vurulması barədə məlumat yayıb. MN itkilər barədə məlumat verməyib. Həmçinin nazirlik bölgə üzərində Ukrayna aviasiyasının olması ilə bağlı məlumatı şərh etməyib.

Sky News mənbəsi Belqorod vilayətindəki sursat anbarına zərbələr endirmək üçün hansı döyüş sursatından istifadə edildiyini dəqiqləşdirməyib. Telekanal qeyd edib ki, ABŞ və Fransa Xarkovu qorumaq üçün Rusiya ərazisindəki hərbi obyektlərə hücum etmək üçün öz silahlarından istifadə etməyə icazə verib.

S.ELAY

XQ