Slovakiyanın baş naziri Robert Fitso deyib ki, Çexiya planlaşdırılan hökumətlərarası məsləhətləşmələri ləğv etməklə Slovakiya–Çexiya münasibətlərini təhlükə altında atıb. Cənab Fitsonun sözlərinə görə, Praqa Nazirlər Kabinetinin birgə iclasının ləğv edilməsinə səbəb kimi Çexiya və Slovakiya hökumətlərinin Ukraynadakı münaqişəyə baxışındakı fərqliliyi göstərib. 

Robert Fitso Facebook-da videomüraciət paylaşıb və bildirib ki, Çexiya hökuməti martın 6-da axşam saatlarında Slovakiya tərəfini hökumətləra­rası məsləhətləşmələrin qeyri-müəyyən müddətə təxirə salınması ilə bağ­lı xəbərdar edib. Görüş apreldə Çexiyada baş tutmalı idi. Cənab Fitsonun sözlərinə görə, bu yolla Çexiya Ukraynadakı münaqişədə maraqlı olduğunu təsdiqləyib. Baş nazir Slovakiyanın həmişə sülhə çağırdığını vurğulayıb.

O videomüraciətində bildirib ki, Slovakiya hökuməti heç vaxt - təkrar edirəm, heç vaxt - dərin Çexiya-Slovakiya münasibətlərini heç bir təhlükəyə məruz qoymayacaq: "Nəzərə alırıq ki, Çexiya hökumətinin rəhbərləri yalnız Ukraynadakı müharibəni dəstəkləməkdə maraqlı olduqları üçün onları riskə atmaq qərarına gəliblər, halbuki Slovakiya hökuməti açıq şəkildə sülhdən danışır".

Eyni zamanda, Robert Fitso Çexiyanın qərarının Slovakiyanın xarici siyasətinə təsir etməyəcəyini vurğulayıb: “Çexiya hökuməti istənilən vaxt Slovakiyada xoş qarşılanır. Biz Slovakiyadakı siyasi münasibətlərimizi Çexiya-Slovakiyanın birgəyaşayışı ilə heç bir əlaqəsi olmayan müxtəlif dünyagörüşü ilə yükləməyəcəyik”.

S.ELAY
XQ