Bu gün Türkiyə Prezidenti Rəcəb Tayyib Ərdoğanın Macarıstan səfəri planlaşdırılır. Siyasi təhlilçilər hesab edirlər ki, səfər Ankara və Budapeşt arasında ikitərəfli münasibətlərin inkişafına təkan verəcək. Məlumatı “Anadolu” verib.
Ekspertlərin fikrincə, Macarıstanda siyasi və diplomatik gündəlikdən əlavə tərəflər iqtisadi əlaqələri müzakirə edəcək, cari ilin on ayında qarşılıqlı ticarət dövriyyəsinin həcmini 3,3 milyarddan 6 milyard dollara çatdıracaq strategiya formalaşdıracaqlar.
Bildirilir ki, Türkiyə liderinin Budapeştə səfəri tarixi bir günə təsadüf edir. Türkiyə ilə Macarıstan arasında Birinci Dünya Müharibəsindən sonra kəsilən diplomatik əlaqələr 1923-cü il dekabrın 18-də İstanbulda imzalanan Dostluq Müqaviləsi ilə bərpa edilib. Bu gün müqavilənin bağlanmasından düz 100 il keçir.
Səfər çərçivəsində Ərdoğan Macarıstan prezidenti Katalin Novak, Baş nazir Viktor Orban və Macarıstan hakimiyyətinin digər nümayəndələri ilə görüşəcək. Türkiyə dövlət başçısını səfərdə Nazirlər Kabinetinin üzvləri müşayiət edəcəklər.
Gözlənilir ki, Ankara və Budapeşt arasında siyasi və iqtisadi əlaqələrlə yanaşı, tərəflər Türkiyənin Avropaya inteqrasiyası mövzusunu, eləcə də Qəzza zolağındakı vəziyyəti müzakirə edəcəklər.
Türkiyə-Macarıstan Yüksək Səviyyəli Strateji Əməkdaşlıq Şurasının iclasının keçirilməsi planlaşdırılır. Türk Dövlətləri Təşkilatında sıx əməkdaşlıq edən Türkiyə və Macarıstanın prioritet məqsədlərindən biri də ilk mərhələdə ticarət dövriyyəsini altı milyard dollara çatdırmaqdır. Budapeşt danışıqlarında sonradan bu rəqəmi 10 milyard dollara çatdırmağa imkan verəcək addımlar da nəzərdən keçiriləcək.
P.ƏMİRCANOV
XQ
