“Biz Kərkükü dinc yanaşı yaşama mədəniyyətinin simvolu kimi görürük”. Bu sözləri Türkiyənin xarici işlər naziri Hakan Fidan Tehranda iranlı həmkarı Hüseyn Əmir Abdullahian ilə görüşündən sonra təşkil edilən birgə mətbuat konfransında söyləyib.

Fidan əlavə edib ki, İraqın Baş nazi­ri Məhəmməd Şia əl-Sudaninin rəhbər­liyi ilə qurulan hökumət ölkəyə sabitlik gətirib: “Biz onun və hökumətinin inf­rastrukturun yenidən qurulması və in­vestisiyaların cəlb edilməsi sahəsində göstərdiyi səyləri dəstəkləyirik. Bunun İraqın bugünü və gələcəyi üçün nə qə­dər vacib olduğunu anlayırıq. Belə bir dönəmdə İraqın əsas və təməl ünsür­lərindən biri olan türkman soydaşları­mızın vətəni olan Kərkükdə insan ölü­münə yol açan gərginliyin yaranmasına kədər və böyük narahatlıqla baxırıq”.

Bu cür gərginliyin qarşısının alın­masının zəruriliyi ilə bağlı fikirlərin əv­vəllər də İraq hakimiyyətinə bildirildiyini vurğulayan Türkiyə xarici işlər naziri deyib:

“Biz İraq hakimiyyətindən PKK-nın şəhərdə son vaxtlar artan varlığına son qoymasını tələb edirik. Kərkük böyük iztirablara və qırğınlara məruz qalmış qədim şəhərdir. Hesab edirik ki, bu şəhərdə həssas sosial tarazlığı qorumaq üçün təmsilçilik və idarəetmə məsələlərində bütün sosial təbəqələr bərabər şəkildə təmsil olunmalıdır. Biz bu formulun tərəfdarıyıq. Türkman soy­daşlarımızın hüquq və mənafelərinin qorunması bizim İraqla bağlı siyasəti­mizin əsas prinsiplərindən biridir. Bun­dan sonra da türkmanların hüquqlarının siyasi intriqalara mövzu olmasına qarşı çıxacağıq və onları bütün sahələrdə dəstəkləyəcəyik”.

Xatırladaq ki, son vaxtlar PKK ter­ror təşkilatı İraqda fəallaşıb. Onların türkmanlara qarşı hücumlar təşkil edə­cəyi ilə bağlı məlumatlar yayılıb. İraq Türkmən Cəbhəsinin (İTC) sözçüsü Məhəmməd Saman məsələ ilə bağlı Anadolu agentliyinə danışıb. M.Saman PKK-nın türkman məmurlara və siyasi partiya binalarına hücum edə biləcəyi ilə bağlı İraq kəşfiyyat bölməsindən xə­bərdarlıq aldıqlarını təsdiqləyib. 

Gərginliyin yaranmasına digər sə­bəb isə İraq hökumətinin Kərkükdə qərargah binasını KDP-yə (Kürdüstan Demokratik Partiyası) verilməsidir. Bu qərar türkmanlar tərəfindən böyük eti­razla qarşılanıb. Onların qətiyyətli etira­zından sonra şəhərdə yaşayan kürdlər təhlükəsizlik qüvvələrinə hücum edib­lər. Kürd məhəllələrində yaşayan azı 40 nəfər İraq təhlükəsizlik qüvvələri tərəfindən saxlanılıb. 

Hazırda İraq ordusu şəhərin kürdlər yaşayan rayonlarına tam nəzarət edir. Şəhərin məhəllələrində İraqın antiterror xidmətinin qüvvələri yerləşdirilib.

Ə.PÜNHAN, XQ