Pol Qogen adını dünya incəsənət tarixinə qızıl hərflərlə yazdıran dahi rəssamlardandır. Rəssam 1848-ci ildə Parisdə anadan olub. Onun yaradıcılığında başlıca yeri postimpressionizm və primitivizm cərəyanları tutur.
Qogenin rəssamlıq arzusu hələ uşaq yaşlarından başlamışdı. Gənclik çağlarında isə o, yaxın dostları Kamil Pizarro, Pol Sezann ilə birlikdə rəsmlər çəkir, dünya rəssamlıq tarixinin gələcək incilərini yaradırdı.
Böyük rəssamın bütün əsərlərində insanlar öz təbiiliyi ilə təsvir olunub. “Sahildə taitili qadınlar”, “Çiçək ilə qadın”, “Günorta mürgüsü”, “İki taitili qadın” və başqa əsərlərində dərin səmimilik hiss edilməkdədir.
“Nə vaxt evlənəcəksən?” adlı tablosunu isə rəssam 1892-ci ildə ərsəyə gətirmişdir. Əsərdə iki taitili qız əks olunub. Rəsm əsərinin dərin və psixoloji anlamı var. Tabloda insan duyğuları və sevgi hissləri ilə bağlı fəlsəfi məqamlar da öz əksini tapıb.
Əsər 2015-ci ildə hərraca çıxarılmış və Qətər şeyxlərindən biri tablonu rekord qiymətə – 300 milyon dollara satın alıb.
Leyla HADİ,
tələbə-jurnalist