Alimlər “deepfake” texnologiyası (mövcud təsvirin süni neyron şəbəkələrindən istifadə edilərək başqası ilə əvəz edilməsi) ilə insanlarda saxta xatirələrin yaradılmasına nail olublar. Belə ki, araşdırma nəticəsində insanların qavrayışlarına və yaddaşlarına kompleks təsir göstərmək mümkün olub.
Təcrübədə iştirak edən 436 nəfər könüllüyə məşhur filmlərin saxta videoları izlədilib və onlardan mətnləri oxumaq tələb olunub. Nəticədə, respondentlərin təxminən 50 faizi filmlərin saxta versiyalarını xatırlayıb. Üstəlik, iştirakçıların çoxu bu versiyaların orijinallardan daha yaxşı olduğunu bildirib.
Tədqiqatın müəllifi G. Murfi qeyd edib ki, hazırda “deepfake” texnologiyası çox böyük təhlükə olmasa da, insanların xatirələrini dəyişdirməklə bağlı narahatlıqlar yaradır. Həmçinin media “deepfake”in real hadisələr deyil, uydurma əsərlər kimi tanınmasını təmin etməlidir.
Əfsanə ƏHƏDLİ, “Xalq qəzeti”
.jpg)