San-Fransisko əhalisi şəhər küçələrində getdikcə artan sürücüsüz taksilərdən narahat olmağa başlayıb. Vətəndaşlar “təhlükəsiz küçə üsyançıları” adlı qruplaşma altında birləşərək hərəkətə keçiblər.
Qrup üzvləri robot taksiləri dayandırmağın yolunu tapıblar. Belə ki, pilotsuz avtomobillərin üzərinə yol xidmətləri tərəfindən tez-tez istifadə olunan zolaqlı plastik trafik konusunu yerləşdirirlər. Bu zaman avtonom idarəetmə sistemi avtomobili dayanma rejimində saxlayır. Bu üsulla şəhər ətrafında səyahət edən pilotsuz taksilər fəaliyyətsiz hala gətirilir.
Qeyd edək ki, şəhər sakinləri bu maşınları insanlar üçün təhlükəli hesab edirlər. Avtonom taksilərin şəhərdəki elektrik dirəklərini zədələməsi, ictimai avtobuslara çırpılması, paytaxt küçələrində sıxlığı artırması ilə bağlı şikayətlər də var. Robot taksi operatorları isə polisdən etirazçılara müdaxilə etməyi xahiş ediblər.
Əfsanə ƏHƏDLİ, “Xalq qəzeti”
