İşğaldan azad edilən bölgələrimizdən, hər gün xoş xəbərlər gözləyirik. Hər köç xəbəri bizim də ürəyimizi o yerlərin sakinləri kimi fərəhlə doldurur.
Dünən Ağalıdan daha bir xoş xəbər aldıq! Belə xəbərlərin davamlı olması diləyilə, onu oxucularımızla da paylaşırıq:
Uzun illərdən sonra işğaldan azad olunan və qısa müddətdə yenidən qurulan Zəngilan rayonunun Ağalı kəndində nişan mərasimi keçirilib.
30 ildən sonra Sumqayıtdan yola düşən maşın karvanı Ağalıda Məmmədovlar ailəsinin evinin qarşısında dayanıb. Sevinc-sevincə, musiqi-musiqiyə qarışdı. Ağalının ilk nişan mərasiminin səsi də uzaqlara yayıldı. Bu yerlərdə ilk xeyir iş sevincini yaşamaq Məmmədovlar ailəsinə nəsib oldu.
Dünyamalıyevlər ailəsi Sumqayıt şəhərindən el adəti ilə Ağalıya, Məmmədovlar ailəsinə qızları Arzu üçün elçi gəliblər. Beləliklə, valideynlərin də xeyir-duasını alan Rüfət və Arzu üçün nişan mərasimi keçirilib və yeni bir ailənin təməli qoyulub.
Qeyd edək ki, Rüfətlə Arzu Məmmədovların ailəsi Ağalıya köçəndən sonra bir-birindən ayrı düşüblər. Telefon əlaqəsi, görüntülü söhbətlər isə ara verməyib. Nəhayət, valideynlərə növbə çatıb. Övladlarının xoş niyyətlərindən sevinən valideynlər bu məsələdə onların yanlarında olduqlarını bildiriblər. Və beləliklə... nişan mərasimi Ağalı kəndinin mərkəzində yerləşən şadlıq evində keçirilib. İki gəncin sevincli günündə ailələri ilə bərabər, Şərqi Zəngəzur İqtisadi rayonu üzrə xüsusi nümayəndəliyin əməkdaşları, kənd sakinləri də iştirak ediblər.
Xoşbəxt olun, gənclər! İnşallah, belə xoş xəbərləri bundan sonra daha çox eşidəcəyik.
“Xalq qəzeti”