Ukraynanın təhlükəsizliyi rəsmi Kiyev ilə NATO rəhbərliyi arasdında müzakirə obyektinə çevrilib. Ukrayna rəsmiləri alyansdan və Qərb ölkələrinin liderlərindən bununla bağlı təhlükəsizliyinə zəmanət istəyirlər.
Məsələ Kişinyovda keçirilən “Avropa siyasi birliyi”nin sammitində müzakirə olunub. Estoniyanın baş naziri Kaja Kallas çıxışında bildirib ki, ukraynalılara ümid vermək lazımdır. “Rusiyaya göstərmək vacibdir ki, biz Ukraynanın tərəfindəyik və Ukraynanın yeri NATO-dur. Aydındır ki, müharibənin davam etdiyi bir vaxtda bu, mümkün deyil. Ancaq ölkənin NATO-ya üzv olacağına dair aydın siqnal vermək vacibdir və biz Ukraynanın tərəfindəyik”.
Fransa Prezidenti Emmanuel Makron isə bir müddət əvvəl Slovakiyanın paytaxtı Bratislavada keçirilmiş beynəlxalq “Globsec” konfransında deyib ki, NATO ölkələri Ukraynanın təhlükəsizliyinə etibarlı təminat verməlidirlər. “2019-cu ilin dekabrında NATO barəsində kəskin danışdım. Blok daxilində Türkiyə ilə bir sıra digər güclər arasında parçalanma var. Mən “beyin ölümü” haqda danışdım. Bu gün qeyd edə bilərəm ki, Putin Ukraynaya qarşı təcavüzkar müharibəsilə NATO-nu oyadıb”, – deyə Fransa Prezidenti bildirib.
Onun sözlərinə görə, Paris Kiyevin hərbi yardım alaraq əldə etdiyi silahlardandan Rusiya ərazisinə hücumlar üçün istifadə edilməsinə qarşıdır, amma öz ərazisini müdafiə etmək cəhdini dəstəkləyir.
Ağ evdən də oxşar açıqlama gəlib. Vurğulanıb ki, ABŞ Kiyevin yardım silahlarından istifadə etməklə, Rusiya ərazisinə hücumlarını dəstəkləmir. Amma yerli silahlarla Rusiya ərazisinə zərbələr endirməsini beynəlxalq hüquq baxımından qanuni hesab edir.
İstənilən halda Ağ ev Ukraynaya hərbi yardımlarını davam etdirir. Yeni yardım paketinə “Avenger” və “Patriot” üçün raketlər daxildir. Bu barədə Pentaqonun saytı xəbər verib. Xəbərdə bildirilir ki, ABŞ Prezidenti Cozef Baydenin administrasiyası Ukraynaya 300 milyon dollarlıq yeni hərbi yardım paketi ayırıb.
Bunların fonunda Ukraynanın NATO-ya üzvlük məsələsi də müzakirə edilir. Norveçin paytaxtı Osloda NATO-nun baş katibi Yens Stoltenberqin sədrliyi ilə NATO xarici işlər nazirlərinin iki günlük qeyri-rəsmi toplantısı keçirilir. Alyansən rəhbəri toplantıdan əvvəl brifinq düzənləyərək deyib: “Rusiyanın Ukraynaya qarşı təcavüzkar müharibəsi beynəlxalq hüququn kobud şəkildə pozulmasıdır. Ukrayna Rusiya ərazisinə hücum edə bilər. Özünümüdafiə hüququ BMT Nizamnaməsində təsbit olunub”.
Müharibəni Rusiya Prezidenti Vladimir Putinin başlatdığını xatırladan Y.Stoltenberq qeyd edib ki, yalnız o, özü bu müharibəni dayandıra bilər: “Biz Ukraynanı dəstəkləyirik və dəstəkləməyə davam edəcəyik. Nə qədər lazımdırsa, Ukraynanın yanında olacağıq. Həmçinin Ukraynaya dəstək NATO-nu münaqişə tərəfi etmir. NATO-nun iki vəzifəsi var: Ukraynanı dəstəkləmək və Rusiyanın Ukraynaya qarşı təcavüzkar müharibəsinin bu ölkədən kənara çıxmasının qarşısını almaq”.
NATO xarici işlər nazirlərinin toplantısında isə Ukraynanın alyansın bir hissəsi olacağa barədə prinsipial razılaşma əldə olunub. Amma bu, Rusiya ilə müharibə başa çatandan sonra nəzərdə tutulur.
Ukrayna Prezidenti Volodimir Zelenski daha əvvəl demişdi ki, o, müharibə bitməmiş Ukraynanın Şimali Atlantika Müqaviləsi Təşkilatına üzv ola bilməyəcəyini başa düşür. Ukrayna lideri ümid etdiyini bildirmişdi ki, NATO-nun iyul sammitində ölkənin alyansa qoşulmasından əvvəl tərəfdaşlardan təhlükəsizlik zəmanəti alacaq.
Təhlükəsizlik zəmanəti ilə bağlı söhbətlərin getdiyi bir vaxtda Ukrayna növbəti hücuma məruz qalıb. Kiyev Regional Hərbi Administrasiyasının yaydığı məlumata görə, iyunun 2-nə keçən gecə Rusiyanın hava hücumu zamanı Kiyev səmasında 30-dan çox pilotsuz təyyarə və raket vurulub. Zərərsizləşdirilən raket və kamikadze dronlarının qalıqlarının düşməsi nəticəsində Podol rayonunda yanğın baş verib.
Ukrayna Silahlı Qüvvələrinin Baş Qərargahının yaydığı məlumatda bildirilib ki, iyunun 2-nə keçən gecə Rusiya hərbçiləri Ukrayna ərazisinə 15 qanadlı raket, 18 kamikadze dronu atıb.
Ukrayna da öz növbəsində Rusiya ərazisinə hücum gerçəkləşdirib. İyunun 2-də pilotsuz uçuş aparatları Smolensk vilayətinin ən böyük enerji obyektlərinə hücum gerçəkləşdirib. Vilayətinin rəhbəri vəzifəsini icra edən Vasili Anoxinin sosial şəbəkələrdə verdiyi məlumata görə, hadisə nəticəsində ölən və xəsarət alan olmayıb. Dronlar mühüm infrastruktur obyektlərinə ciddi ziyan vura bilməyib. Anoxin bildirib ki, zərbə gecə saat 3 radələrində baş verib.
Xatırladaq ki, daha əvvəl Kaluqa yaxınlığında naməlum obyektin düşməsi barədə məlumat yayılmışdı.
Pünhan ƏFƏNDİYEV, “Xalq qəzeti”