NATO-nun rəhbərlik etdiyi sülhməramlı qüvvələr (KFOR) Kosovonun şimalında bələdiyyə binalarının təhlükəsizliyini gücləndirib. Əsgərlər bazar ertəsi etnik serblərlə toqquşmalarda 30 sülhməramlının yaralandığı bloku mühasirəyə alıblar.
İğtişaşların səbəbi bələdiyyə seçkiləridir. Kosovo serbləri yerli bələdiyyə seçkilərinin nəticələrindən narazıdır. Küçə toqquşmaları Balkanların bu bölgəsində qeyri-sabitlik qorxusunu artırıb. Etnik gərginliyin daha da yülsəlməsinin qarşısını almaq üçün NATO ölkəyə əlavə 700 hərbçi göndərməyi qərara alıb.
“NATO-nun sülhməramlı qüvvələri Kosovoda vətəndaşlar üçün təhlükəsiz və dinc mühitin qorunması naminə bütün lazımi tədbirləri görəcək. Biz BMT mandatına uyğun olaraq qərəzsiz hərəkət etməyə davam edəcəyik”, - deyə NATO-nun baş katibi Yens Stoltenberq bildirib.
Bu arada diplomatik səviyyədə intensiv səylər göstərilir. Serbiya Prezidenti Aleksandar Vuçiç beş vasitəçi ölkənn (Fransa, Almaniya, İtaliya, Böyük Britaniya və ABŞ) səfirlərini Kosovodakı serblərin təhlükəsizliyinə zəmanət verməyə çağırıb.
Eyni zamanda, Kosovonun baş naziri Albin Kurti videomüraciətində təkid edib ki, xalq tərəfindən seçilən şəhər merləri bələdiyyə hökumətinin yeganə qanuni nümayəndələridir.
Pünhan Şövkətoğlu, “Xalq qəzeti”
