Ukrayna Müdafiə Qüvvələri rəqibin 22 hücumunu dəf edib. Bu barədə Ukrayna Silahlı Qüvvələri Baş Qərargahından bildirilib. Xəbəri UNİAN agentliyi yayıb.
Məlumatda deyilir: “Son 24 saat ərzində Rusiya Federasiyası “Shahed” PUA-larından istifadə etməklə Ukrayna ərazisinə növbəti kütləvi hava zərbələri endirib. Demək olar ki, bütün pilotsuz təyyarələr müdafiəçilərimiz tərəfindən məhv edilib. Bununla belə, dinc əhali arasında ölənlər var. Binalara, digər mülki və inzibati infrastruktura ziyan dəyib”.
Xəbərdə həmçinin deyilir ki, Rusiya tərəfi əsas səylərini Luqansk və Donetsk vilayətlərini tamamilə işğal etmək niyyətindən əl çəkməyib.
Ukrayna Silahlı Qüvvələrinin Hərbi Dəniz Qüvvələrinin komandanı Oleksiy Neijpapa bildirib ki, Ukrayna hərbçiləri Rusiya donanmasının 18 gəmisini məhv edib. O qeyd edib ki, bu rəqəmə həm gəmilər, həm də katerlər daxildir. Onların arasında “Zmeiny” adasını ələ keçirmək üçün əməliyyatlarda istifadə edilən “Rapter” tipli bir neçə desant gəmisi də var.
Bu arada Ukrayna Silahlı Qüvvələrinin cavab tədbiri olaraq əks-hücuma keçəcəyi barədə məlumatlar yayılıb. ABŞ-ın respublikaçı senatoru Lindsey Graham deyib ki, Ukraynanın əks-hücum planı effektli olacaq. “Yaxın günlərdə siz ukraynalıların kifayət qədər təsirli güc nümayişini görəcəksiniz”, – siyasətçi deyib.
Təhlilçilər bildiriblər ki, müttəfiqlər lazımi silahları Ukraynaya ötürdükdən sonra əks-hücum əməliyyatına başlanılacaq və səmərəli olacaq. Onların fikrincə, Rusiyanın cavab vermək imkanları məhduddur. Ukrayna Silahlı Qüvvələrinin Ali Baş Komandanı Valeri Zalujnı da əks-hücum əməliyyatından danışıb. O bildirib: “Bizim geri qayıtmağımızın vaxtıdır”.
Mayın 29-da isə Prezident Volodimir Zelenski Ukrayna qoşunlarının yerdəyişməsi ilə bağlı qərarın artıq qəbul edildiyini bildirib.
Dövlət başçısı ordunun silahla təminatının yaxşılaşdırılması istiqamətində də tədbirlər görüldüyünü deyib. Onun Britaniyanın “BAE Systems” müdafiə şirkətinin nümayəndələri ilə videogörüşü olub. Həmin şirkət “Challenger” tankları və M777 haubitsaları istehsal edir.
“Biz Ukraynada “BAE Systems” ofisinin, daha sonra isə şirkətin məhsulları üçün təmir və istehsal müəssisələrinin açılması üzrə işə başlamaq barədə razılığa gəldik”, – deyə Zelenski əlavə edib.
Ukraynaya hərbi yardımın göstərilməsi NATO ölkələrinin xarici işlər nazirlərinin Osloda keçiriləcək ikigünlük görüşündə də müzakirə ediləcək. “Politico” qəzetinin yazdığına görə, görüşdə hərbi münaqişə səbəbindən alyansa daxil ola bilməyən Ukraynaya Vilnüs sammitində nə vəd edilə biləcəyi məsələsi də diqqətdə olacaq. 2022-ci ilin fevral ayının sonundan indiyədək alyansın heç bir iclası bu mövzu müzakirə olunmadan keçirilməyib.
Qeyd edək ki, ABŞ və Qərbin hərbi yardımlarından əlavə, xeyriyyə fondları da Ukrayna Silahlı Qüvvələrinə silah tədarük edir. Məsələn, “Favbet Foundation” xeyriyyə fondunun yardımı ilə Ukrayna 120 hərbi maşın alıb. Xatırladaq ki, ümumilikdə, Favbet Fondunun yardımı ilə Ukrayna Silahlı Qüvvələri artıq 65-dən çox pilotsuz təyyarə və yüzlərlə yüksək texnologiyalı avadanlıq alıb.
Ukrayna hərbçilərinin yaxın günlərdə əks-hücum əməliyyatına başlayacağı barədə xəbərlər isə Rusiyanın Ukrayna ilə sərhəddə yerləşən vilayətlərində narahatlıq yaradıb. Artıq Rusiyanın Belqorod vilayətinin Şebekino və Qrayvoronsk dairələrindən 300 uşaq təxliyə edilib. Uşaqlar Voronej vilayətinə aparılıb.
Rusiya tərəfinin narahatlığı isə başadüşüləndi. Çünki Ukrayna ilə sərhəddə yerləşən Belqorod vilayəti mütəmadi artilleriya zərbələrinə məruz qalır. Ötən gecə Şebekino şəhəri “Qrad” sistemlərindən yaylım atəşinə tutulub. Nəticədə, bir neçə yaşayış binasına, məktəbə və inzibati binaya ziyan dəyib.
P.ƏFƏNDİYEV, “Xalq qəzeti”