Mayın 31-də Bakı Enerji Həftəsi öz işinə başlayacaq. İyunun 3-dək davam edəcək həftə çərçivəsində 28-ci Beynəlxalq Xəzər Neft və Qaz Sərgisi (“Caspian Oil&Gas”), 11-ci Xəzər Beynəlxalq Energetika və Yaşıl Enerji Sərgisi (“Caspian Power”), eləcə də 28-ci Bakı Enerji Forumu keçiriləcək.
“Caspian Oil&Gas” və “Caspian Power” sərgiləri Bakı Ekspo Mərkəzində, Bakı Enerji Forumu isə Bakı Konqres Mərkəzində baş tutacaq. Bu və ya digər məsələlər barədə Bakı Enerji Həftəsinə həsr olunmuş mətbuat konfransında ətraflı məlumat verildi.
“Iteca Caspian” şirkətinin satış ürə direktoru Orxan Əhmədov bildirdi ki, Bakı Enerji Həftəsi çərçivəsində keçiriləcək tədbirlərdə 37 ölkədən 326 şirkət iştirak edəcək. Azərbaycanda beynəlxalq sərgilərin keçirilməsi təşəbbüsünün ümummilli lider Heydər Əliyev tərəfindən irəli sürüldüyünü diqqətə çatdıran O. Əhmədov dedi ki, 1994-cü ildə keçirilən ilk sərgidən etibarən ulu öndər bu mötəbər beynəlxalq tədbiri dəstəkləyərək onun daimi iştirakçisı olub. Qeyd olundu ki, ulu öndər Heydər Əliyevin anadan olmasının 100 illik yubileyi bütün sərgilərin proqramlarında öz əksini tapacaq. Bakı Enerji Həftəsinin təşkilatçıları və iştirakçıları Azərbaycanın sərgi sənayesinin formalaşmasında ümummilli liderin rolunu heç vaxt unutmur və xatirəsini dərin ehtiramla yad edirlər. Bu məqsədlə Bakı Enerji Həftəsi çərçivəsində Heydər Əliyevin anadan olmasının 100 illiyinə həsr olunmuş poçt markası buraxılıb. Eyni zamanda, tədbir çərçivəsində Heydər Əliyevin 100 illik yubileyinə həsr olunmuş stend nümayiş olunacaq.
Yeri gəlmişkən, ənənəvi olaraq bu il də Bakı Enerji Həftəsində yüksək rütbəli qonaqların iştirak edəcəyi gözlənilir. Bu barədə məlumat verən “Iteca Caspian” şirkətinin layihə rəhbəri Aynurə Nəzərli qeyd etdi ki, Bakı Enerji Həftəsinin bir çox dünya ölkələrindən olan şirkətləri, yüksək səviyyəli qonaqları, dövlət xadimlərini və beynəlxalq enerji ekspertlərini Bakıya toplaması təsadüfi deyil. Belə ki, Azərbaycan paytaxtı artıq uzun müddətdir ki, nüfuzlu tədbirlərin təşkil edildiyi, mühüm qərarların və əməkdaşlıq məsələlərinin müzakirə edildiyi məkana çevrilib. Bundan əlavə, Azərbaycanın enerji sahəsində həyata keçirdiyi uğurlu siyasət nəticəsində respublikamız təkcə özünün deyil, digər ölkələrin də enerji təhlükəsizliyinin təminatında mühüm rol oynayır.
Bakı Enerji Həftəsinin nüfuzunu və yüksək statusunu onun sponsorlarının genişlənən tərkibinin də təsdiq etdiyini vurğulayan A. Nəzərli bildirdi ki, SOCAR-ın baş sponsorluğu ilə keçirilən Bakı Enerji Həftəsinin sponsorları AbuDhabi Port, ACWA Power, Ansaldo Energia, AZEL SYSTEMS, Azeri M-I Drilling Fluids, AZFEN, Baku Steel Company, bp, Caspian Drilling Company, Caspian Marine Services, Equinor, EP Absheron, Intertek, Global Energy Azerbaijan, GL, Inpex, KOLIN Construction, MASDAR, Tekfen, Total Energies, Turkish Petroleum, Uniper, Ural Steel şirkətləridir. Bakı Enerji Forumunun intellektual tərəfdaşı qismində Boston Consulting Group çıxış edir. BMW brendini təmsil edən Improtex Motors şirkəti isə forumda yeni elektrik avtomobil modelini təqdim edəcək.
Qeyd olundu ki, “Caspian Oil&Gas” sərgisi artıq uzun illərdir ki, neft, qaz və enerji sektorunda əhəmiyyətli əməkdaşlıqlar üçün bir platformaya çevrilib. Hər il Azərbaycan Respublikasının Prezidenti İlham Əliyevin açılış mərasimində iştirakı isə sərginin yüksək statusunu bir daha təsdiqləyir. Uzun illər uğurla təşkil edilən sərgiyə ABŞ, Böyük Britaniya, Türkiyə və digər ölkələrin birinci şəxsləri öz təbrik məktubları göndərirlər. Eyni zamanda, Bakı Enerji Həftəsində, ənənəvi olaraq, yüksək rütbəli qonaqlar iştirak edirlər.
“Caspian Oil&Gas” sərgisində Xəzər regionunun əsas neft-qaz layihələri və regionda enerji təhlükəsizliyi müzakirə olunacaq. Sərginin əhatə etdiyi mühüm mövzulara neft və qaz yataqlarının işlənməsi, neft və qazın nəqli və hasilatı, boru kəmərinin təhlükəsizlik sistemlərinin təmin edilməsi, neft-qaz emalı, enerji sektorunda tikinti-quraşdırma işləri, innovativ texnologiyalar, maliyyə və hüquqi xidmətlər, kimya sənayesi və s. daxildir.
“Caspian Oil&Gas” ilə eyni günlərdə təşkil ediləcək Xəzər Beynəlxalq Energetika və Yaşıl Enerji Sərgisi– “Caspian Power”də beynəlxalq və yerli şirkətlərin energetika və bərpaolunan enerji mənbələrinin inkişafı və istifadəsi sahəsindəki yeniliklər və bununla bağlı təkliflər əks olunacaq. Sərgidə günəş enerjisi, külək enerjisi, geotermal enerji, istilik energetikası, nüvə enerjisi, maşınqayırma və enerji avadanlıqları, elektrik nəqliyyat vasitələri və elektromobillər, enerji və resurslara qənaət edən texnologiyalar və digər mövzular müzakirə olunacaq.
Bu il təşkil olunacaq Bakı Enerji Həftəsi çərçivəsində Naxçıvan şəhərində mühüm mövzuları əhatə edən sessiyalar keçiriləcək. Belə ki, ulu öndər Heydər Əliyevin 100 illik yubileyinə həsr olunmuş xüsusi sessiya şəhərin tarixi əhəmiyyətini əks etdirəcək. Bundan başqa, dövlət səviyyəsində Naxçıvanı “yaşıl enerji” zonasına çevirmək planlaşdırılır. Bu baxımdan sessiyalar zamanı Naxçıvana sərmayə qoyuluşu və enerji ixracı məsələləri müzakirə olunacaq.
Enerji həftəsinə Bakı Enerji Forumu ilə yekun vurulacaq. Forumda həm Azərbaycan, həm də Xəzər regionu üçün vacib olan enerji məsələləri müzakirə olunacaq. 600-dən çox nümayəndənin iştirak edəcəyi tədbir zamanı keçid dövründə qlobal enerji təhlükəsizliyi, Azərbaycanın enerji sektorunun Avropanın enerji təhlükəsizliyi və enerji balansında rolu və s. daxil olmaqla keçid dövründə yeni enerji şərtləri ilə bağlı müzakirələr aparılacaq. Yeni qlobal enerji nizamının inkişaf ssenarilərinə həsr olunmuş “dəyirmi masa”da isə qlobal enerji keçidi prosesi, enerji böhranı zamanı enerji keçidinin sürətləndirilməsi yolları kimi mövzular müzakirə olunacaq. Bundan əlavə, tədbir zamanı Xəzər regionunun bərpaolunan enerji mənbələri və potensialı, onlardan istifadə imkanları, bərpaolunan enerji mənbələrinin infrastrukturunun inkişafı, “yaşıl enerji” sahəsində həyata keçirilən layihələr də diqqət mərkəzində olacaq.
Qeyd edək ki, Xəzər regionunun ən nüfuzlu enerji tədbiri olan Bakı Enerji Həftəsinin təşkilatçısı Böyük Britaniyanın “Iteca Caspian”, və “Caspian Event Oraganisers” və onların beynəlxalq tərəfdaşları olan “ICA Events”, CEM FZ LLC şirkətləridir. Bundan əlavə, Azərbaycan Respublikasının Energetika Nazirliyi və SOCAR tədbirə rəsmi dəstək göstərəcək.
Mirbağır YAQUBZADƏ,
“Xalq qəzeti”