AMEA-nın Mərkəzi Elmi Kitabxanasında Elm və Təhsil Nazirliyinin Fiziologiya İnstitutunun və Türkiyənin İqtisadi İnkişaf və Sosial Tədqiqatlar İnstitutunun (İKSAD) birgə təşkilatçılığı ilə hibrid formatda Beynəlxalq Tibb və Sağlamlıq Elmləri mövzusunda VIII beynəlxalq elmi-praktik konqres davam edir.
Ümumilikdə konqresdə 20 ölkədən - Türkiyə, Pakistan, Qazaxıstan, Albaniya, Anqola, Braziliya, Bolqarıstan, Çin, Çexiya, Hindistan, İran, Monteneqro, Mərakeş, Nigeriya, Polşa, Portuqaliya, Rumıniya, Serbiya və s. 200-dən çox nümayəndə iştirak edir.
Vətən müharibəsində qələbəmizin 5-ci ildönümünə həsr edilən və elmi mövzusu təbii faktorların tibbi praktikada istifadəsinə aid olan konqresi giriş sözü ilə AMEA-nın prezidenti, akademik İsa Həbibbəyli açaraq qeyd edib ki, konqres ölkəmiz üçün əlamətdar hadisəyə - Vətən müharibəsində qələbənin 5-ci ildönümünə həsr olunub. Beynəlxalq toplantı ötən payız Azərbaycanda keçirilmiş COP29 konfransı və “Yaşıl dünya naminə həmrəylik ili” kimi tədbirlərin davamı olaraq ölkəmizdə iqlimə, yaşıl dünyaya, tibbə, sağlamlığa verilən dəyərin elmi təzahürüdür. Belə konqreslər yaşıl iqtisadiyyat, yaşıl iqtisadi zonanın daha da genişlənməsinə, sağlamlığımızın rifahına xidmət edir. Akademik həmçinin vurğulayıb ki, müalicəvi Naftalan neftinə, 1.500 növ müalicəvi bitkiyə, mineral sulara, Duzdağ kimi zəngin təbii resurslara malik olan Azərbaycan üçün bu faktorların tibdə istifadəsinin elmi əsaslarının işlənməsi ölkəmiz üçün prioritet təşkil edir.
“Ölkəmizdə “Naftalan” Müalicə Sağlamlıq Mərkəzi yenidən qurulub. Dünyada yeganə çəlik, əsa muzeyi Naftalandadır. Eləcə də Duzdağ Fizioterapiya Sağlamlıq Mərkəzi də yenidən qurulub. Bütün bunlar öz insanlarının sağlamlığını qoruyan dövlətimizin vətəndaşları qarşısında növbəti bir addımı və yeniliyidır. Əminik ki, bu yeniliklərlə təbii resursların tibb sahəsində tətbiqi aydın bir təfəkkürə xidmət edəcək”, – deyə AMEA-nın prezidenti söyləyib.
Mərasimdə Elm və Ali Təhsil üzrə Dövlət Agentliyinin nümayəndəsi İltifat İbrahimov, İKSAD-ın Azərbaycan üzrə baş direktoru Əlvan Cəfərov, AMEA-nın müxbir üzvü Elşad Qurbanov, Türkiyənin İnönü Universitetinin Əczaçılıq fakültəsinin professoru İsmet Yılmaz, Çin Xalq Respublikasından “Lingren Group”un sədri Li Zhang, onlayn formatda Pekin Universitetindən doktor Liu Tingfang çıxış edərək elmi məclisin əhəmiyyətindən danışıblar.
Fiziologiya İnstitutunun direktoru professor Ulduz Həşimova bildirib ki, təbii bitkilərlə zəngin ölkə olan Azərbaycanda bu sərvətdən istifadə etmək, onun müalicəvi əhəmiyyətini daha dərindən araşdırmaq, tədqiq etmək alimlərin üzərinə böyük məsuliyyət qoyur.
Elmi-praktik konqres 20 bölmə iclasında öz işini davam etdirib. Xərçəngin erkən diaqnostikası, biotibbi materialların inkişafı, neyrodegenerativ xəstəliklər, ictimai səhiyyə modelləri və süni intellektin tibb sahəsinə tətbiqinə dair geniş müzakirələr aparılıb.
Beynəlxalq tədbirə bu gün yekun vurulacaq.
Ə.ƏLİYEV
XQ
