Son vaxtlar Samux rayonunda yaşıllıqların sayı nəzərəçarpacaq dərəcədə artırılıb, yeni park və xiyabanlar salınıb. Bütün bunları əhali sonsuz razılıqla qarşılayır.

Növbəti bir aksiya Samux-Kür magistral yolunun kənarlarında aparılıb.  “Konstitusiya və Suverenlik İli” çərçivəsində keçirilən bu iməcilik aksiyasına rayon icra hakimiyyətinin başçısı Firdovsi Əliyev özü  rəhbərlik edib. İcra Hakimiyyətinin əməkdaşları, idarə, müəssisə və təşkilatların işçiləri, rayon ictimaiyyətinin nümayəndələri də  könüllü olaraq iməciliyə çıxıblar. 

Aksiya çərçivəsində rayon ərazisi, əsasən də Samux-Kür magistral yolunun hər iki tərəfi məişət tullantılarından, qurumuç otlardan, kol-kosdan təmizlənib, yeni ağac və gül kolları əkilib.

Qeyd edək ki, rayon icra hakimiyyətinin yaşıllığa diqqəti, iməciliklərlə bağlı təşəbbüslər irəli sürməsi adamların ruh yüksəkliyini artırıb. İndi heç təşəbbüs olmadan da kənd camaatı öz qapı-bacalarının ətrafında səliqə-sahman yaradır, ağac, gül kolu əkir, yollarını nizama salırlar.

Hamlet Qasımov,
XQ-nin bölgə müxbiri,
Samux rayonu