Sayğı və qayğı onlara həyat eşqi gətirir
Autizm spektri pozğunluğu olan insanlar kimlərdir? Qeyri-adi, çox vaxt hətta istedadlı olan bu insanları yaxından tanıdıqca onların dünyaya baxışlarının nə qədər fərqli olduğunu daha dərindən hiss edirsən.
Aprelin 4-də Azərbaycan Dövlət Mədəniyyət və İncəsənət Universitetində “Rəngli dünyalar: autizm və sevgi” adlı toplantıda öz bacarıqlarını nümayiş etdirən autizmli uşaqlar iştirakçılara sevincli anlar yaşatdılar. Öz anaları ilə səhnəyə çıxan uşaqlar böyük həvəslə mahnı oxudular. Onlar ana-bala rəqsi, vals, şeir, musiqi alətində ifa, intellektual söz yarışması və s. təqdim etdilər.
Şənliyin təşkilatçısı, “Əlilliyi olan şəxslərə sosial dəstək” İctimai Birliyinin sədri Təranə Musayeva XQ-yə verdiyi açıqlamada qeyd etdi ki, məqsəd autizmli uşaqların ailələrinin qarşılaşdığı problemlər, onların qayğıları və uşaqlarının inkişafına göstərdiyi diqqət, autizmli uşaqların cəmiyyətə inteqrasiyasıdır:
– Bu görüş bir qədər fərqlidir. Həmişə mütəxəssislər danışırlar. Bu dəfə anaları və övladlarını dinlədik. Onlar həyat qayğılarından, çətinliklərdən, problemlərdən bəhs etdilər. Autizmli uşaqlar anaları ilə məharətlərini göstərdilər.
Autizmli uşaqlardan biri Şamxal Xələflinin anası Zəhra xanım bu yanaşmanın əhəmiyyətini vurğuladı:
– Autizmli uşaqların ailələrinin, xüsusən anaların fədakarlığını xüsusi qeyd etmək istəyirəm. Belə münasibət bizim üçün önəmlidir. Ailələrimizin qarşılaşdıqları problemlərdən və apardığımız işlərdən danışdıq. Autizmli uşaqlar istedad və bacarıqlarını nümayiş etdirdilər.
Digər valideyn, “Autizmli uşaqların ailələrinə dəstək” İctimai Birliyin sədri Şəhla Mirzəməmmədova əlilliyi olan uşaqlarla bağlı məsuliyyətdən danışdı. O qeyd etdi ki, çətinliklərə sinə gərmək üçün mütləq onlara dəstək lazımdır. Başqa bir ana Humay Quliyeva uşaqların inkişafında musiqinin müsbət təsirindən, eyni zamanda, anaların rolundan bəhs etdi.
Niyazi adına 22 saylı Uşaq Musiqi Məktəbinin 2-ci sinif şagirdi, Qran-pri mükafatçısı Ayxan Quluzadə pianoda ifası ilə hamını heyran etdi. 268 saylı xüsusi məktəbin şagirdləri Murad Hüseynov, Tunay Mirzəməmmədova, Tunar Alıyev, Mədinə Babazadə, Mədinə Ramazanova, Elvin Məmmədov və Zümrüd Abbasovanın “Biz fərqliyik” valsı da böyük maraq doğurdu. Elay Aydınlı, Xumar Məmmədli, Sənan Kazımlı, Zəhra Qurbanova və başqalarının isə anaları ilə valsı xoş təəssürat yaratdı.
Görüşdə əmək və əhalinin sosial müdafiəsi nazirinin müşaviri Jalə Əhmədova, Yasamal Rayon İcra Hakimiyyətinin nümayəndəsi Təravət Muradova, Milli Məclisin deputatları və digər qonaqlar iştirak edirdilər.
İştirakçılar autizmli uşaqların əl işlərindən ibarət satış-sərgi ilə də tanış oldular.
Sonda uşaqlara həvəsləndirici hədiyyələr və təşəkkürnamələr, analara isə “Fədakar ana” diplomu təqdim olundu.
Leyla QURBANOVA
XQ
