Aprelin 4-də Azərbaycan Dövlət Pedaqoji Universitetində (ADPU) Yeni Azərbaycan Partiyası (YAP) Səbail rayon təşkilatının “Ü.Hacıbəyli-68” Ərazi Partiya Təşkilatının (ƏPT) təşkilatçılığı ilə Aprel döyüşlərinin 9-cu ildönümünə həsr olunmuş anım tədbiri keçirilib. Tədbirdə universitetin rəhbərliyi, hərbçilər, professor-müəllim heyəti, şəhid ailələrinin üzvləri və tələbələr iştirak ediblər.

Tədbirdən öncə iştirakçılar universitetin foyesində şəhidlərin xatirəsini əbədiləşdirmək məqsədilə yaradılmış “Zəfər guşəsi”ni və Ulu Öndər Heydər Əliyevin abidəsini ziyarət edib, abidə önünə tər çiçəklər qoyublar.

Tədbirdə açılış nitqi ilə çıxış edən “Ü.Hacıbəyli-68” ƏPT sədri dosent Sultənəli Qurbanov Aprel döyüşlərinin əhəmiyyətindən danışaraq, bu qələbənin xalqın və ordunun birliyi sayəsində əldə edildiyini vurğulayıb.

ADPU-nun rektoru professor Cəfər Cəfərov çıxışında Aprel döyüşlərinin Azərbaycan tarixində mühüm hadisə olduğunu, bu qələbənin 2020-ci ildəki Böyük Zəfərin əsasını qoyduğunu bildirib. C.Cəfərov şəhidlərimizin igidliyinin heç zaman unudulmayacağını və onların xatirəsinin daim uca tutulacağını qeyd edib. Bu gün müstəqil və güclü Azərbaycanın regionda sabitliyin və inkişafın qarantı olduğunu qeyd edən rektor ordu quruculuğu sahəsində atılan addımların, şəhid və qazilərimizə göstərilən qayğının, Vətən müharibəsindən sonra azad olunan torpaqlarda aparılan genişmiqyaslı quruculuq işlərinin ölkəmizin inkişaf yolunu daha da möhkəmləndirdiyini diqqətə çatdırıb.

Tədbirdə şəhid ailələrinin üzvləri – Milli Qəhrəman Polad Həşimovun anası Səmaya Həşimova, şəhid Cabrayıl Dövlətzadənin anası Məleyka Məmmədzadə, şəhid Xudayar Yusifzadənin anası Rada Qurbanova və şəhid Pəncəli Teymurun anası Vahimə Teymurova çıxış edərək, övladlarının timsallarında qəhrəman Azərbaycan oğullarının həm Aprel döyüşlərində, həm də Vətən müharibəsində göstərdikləri qəhrəmanlıqlardan söz açıblar. Onlar, həmçinin Azərbaycan dövlətinin şəhid ailələrinə və qazilərə olan diqqət və qayğısına görə minnətdarlıqlarını bildiriblər.

Azərbaycan Xüsusi Təyinatlı Qüvvələrinin nümayəndəsi Fərid Fərəyad döyüşlər zamanı hərbçilərimizin göstərdiyi igidlik və döyüş ruhundan danışıb, Azərbaycan Ordusunun Vətənə sədaqətini bir daha vurğulayıb.

ADPU-nun sosial və humanitar məsələlər üzrə prorektoru professor Fikrət Rzayev çıxış edərək Aprel döyüşlərinin tarixi əhəmiyyətindən və bu cür tədbirlərin gənclər arasında vətənpərvərlik ruhunun aşılanması baxımından vacibliyindən söz açıb.