Azərbaycanın telekommunikasiya və poçt xidmətləri üzrə tənzimləyici qurumu İnformasiya Kommunikasiya Texnologiyaları Agentliyi (İKTA) 2023-cü ilin əvvəllərindən başlayaraq operator və provayderlərdən onların telekommunikasiya xidmətləri üzrə keyfiyyət (QoS) göstəriciləri üzrə məlumatların toplanması prosesinə başlayıb.

Bu məqsədlə İKTA tərəfindən müvafiq elektron xidmət və informasiya sistemi – DCS (data collection system) hazırlanaraq istifadəyə verilib.

Agentliyin topladığı məlumatlardan telekommunikasiya sahəsində zəruri təhlillərin aparılması və xidmət bazarlarının formalaşdırılması istiqamətində müvafiq tədbirlər görmək üçün istifadə olunur.

Elektron sistem vasitəsilə təqdim olunan hesabatlar üzrə müxtəlif telekommunikasiya xidmətlərinin fəaliyyətinin və etibarlılığının qiymətləndirilməsi üçün 2024-cü ilin I rübü üzrə 273 hesabat, 2024-cü ilin II rübü üzrə isə 266 hesabat daxil olub.

Bu hesabatlar bir sıra əsas QoS parametrlərini, o cümlədən telefon (məftilli), sellülar (mobil), internet və müştəri xidmətləri ilə bağlı məsələləri əhatə edir.

İnternet xidmətlərinin keyfiyyət göstəriciləri xidmət bazarlarının formalaşdırılması istiqamətində tədbirlərin görülməsi üçün hazırlanıb. İnternet xidmətləri üzrə “Xidmətə qoşulma müddəti”, “Fakturalanmış yükləmə-endirmə qabiliyyəti”, “İP paket itkisi”, “Jitter”, “DATA-nın yükləmə-endirmə zamanı kimi xidmət keyfiyyət göstəriciləri” təhlil olunub. “Xidmətə qoşulma müddəti”  göstəricisi üzrə orta xidmət müddəti 3 günə bərabərdir.

Qeyd edək ki, müvafiq göstərici üzrə hesablanmış rəqəm hədəf olaraq müəyyən edilən 6 gün  müddətini 2 dəfə qabaqlayır. Operator və provayderlərin 98%-i qeyd olunan hədəfə çatıb. “Fakturalanmış yükləmə-endirmə qabiliyyəti” göstəricisi üzrə provayderlərin 78%-i hədəfə çatıb. Təqdim olunmuş hesabatlara əsasən, müvafiq göstərici üzrə orta nəticə hədəf olaraq müəyyən edilmiş minimum 75% göstəricidən 5% yüksək olmaqla 80%-ə bərabər olub.

2024-cü ilin I rübü və 2024-cü ilin II rübü üzrə toplanan hesabatlarda müəyyən olunub ki, “Bərpa səviyyəsi” və “Jitter” göstəricisi üzrə provayderlərin 78%-i qeyd olunan hədəfə çatıb.

Müştəri xidmətlərinə dair “Çağrı mərkəzinin cavab müddəti”, “Şikayətlərin aradan qaldırılma müddəti”, “İstehlakçı şikayəti sıxlığı” kimi xidmətlərin keyfiyyət göstəriciləri təhlil edilib.  “Çağrı mərkəzinin cavab müddəti” üzrə provayderlərin 72%-i hədəfə çatıb. “İstehlakçı şikayət sıxlığı” (hesab faktura ilə bağlı) göstəricisi üzrə provayderlərin 59%-i qeyd olunan hədəfə çatıb.

Həmçinin ölkəmizdə rəqabətli və keyfiyyətli telekommunikasiya bazarının formalaşmasına xidmət edən normativ hüquqi akt Azərbaycan Respublikasının Rəqəmsal İnkişaf və Nəqliyyat Nazirliyinin Kollegiyasının 2023-cü il 21 dekabr tarixli 3-27/3-7-18/2023 nömrəli Qərarı ilə “Rabitə və yüksək texnologiyalar sahəsi üzrə xidmətlərin, o cümlədən internet xidmətlərinin keyfiyyət göstəriciləri” təsdiq edilib və müvafiq sənəd Azərbaycan Respublikasının Hüquqi Aktların Dövlət Reyestrinə daxil edilib (https://e-qanun.az/framework/56001). Sənəd telefon (məftilli) və sellülar (mobil) rabitə, internet xidmətləri, eləcə də bu xidmətlər üzrə müştəri xidmətlərinə dair xidmət keyfiyyət göstəricilərini müəyyən etməklə provayder və operatorların göstərdikləri xidmətin keyfiyyətinin təmin edilməsini və bu göstəricilərin tələb olunan səviyyədən aşağı olmamasını tələb edir. Bu da öz növbəsində ümumilikdə müştəri məmnuniyyətinin artırılmasına, həmçinin sağlam rəqabət mühitinin formalaşmasına şərait yaradacaq.

Qeyd edək ki, İnformasiya Kommunikasiya Texnologiyaları Agentliyi müvafiq xidmətlərin keyfiyyətinin qiymətləndirilməsi və yüksəldilməsi ilə bağlı fəaliyyətini davam etdirəcək.