Bu günlərdə İsmayıllı rayonunda jurnalistlərin və sosial media blogerlərinin iştirakı ilə “Ailə, qadın və uşaq problemlərinin mediada işıqlandırılması” mövzusunda təlim keçilib. Məqsəd qələm əhlinin bu sahədə bilik və bacarıqlarının gücləndirilməsi, uşaq hüquqları və gender bərabərliyinə dair informasiyanın yayımlanmasında həssaslığın artırılmasıdır.
Təlimin ilk günündə Ailə, Qadın və Uşaq problemləri üzrə Dövlət Komitəsinin Hüquqi təminat şöbəsinin əməkdaşı Tural Hüseynzadə “Ailə, qadın və uşaq məsələlərinə hüquqi yanaşma: media müstəvisində” mövzusu üzrə çıxış edərək, məişət zorakılığı və gender əsaslı zorakılıq halları ilə mübarizə istiqamətində mövcud qanunvericilik, həmçinin media nümayəndələrinin üzərinə düşən öhdəliklər barədə danışıb. O, məlumatlar işıqlandırılarkən cinsi ayrı-seçkiliyə yol verilməməsi, balans, dəqiqlik, mənbə müxtəlifliyi kimi prinsiplərə diqqətlə yanaşmanın vacibliyini vurğulayıb.
İkinci gün “Mediada psixoloji sağlamlıq: intihar və bənzərliklər” mövzusunda klinik psixoloq-psixoterapevt Rövşən Nəcəfov intihar düşüncələrinin qaynaqlarına və onların müasir müalicə metodlarına dair məlumat verib. Vurğulayıb ki, intihar xəbərlərinin geniş yayıldığı hallarda bir bölgədə ardıcıl intihar hadisələri müşahidə edilə bilər. Bu, psixologiya elmində “suicide clusters” (“zəncirvari intihar”) adlanır və belə hadisələr insanların bir-birini təhrik etməsi nəticəsində yaranır.
Həmin gün jurnalistlər və sosial media blogerləri İsmayıllı Uşaq və Ailələrə Dəstək Mərkəzində olublar.
Təlim müddətində qadın və uşaq hüquqlarının düzgün işıqlandırılması prinsipləri, media vasitəsilə gender stereotipləri və məişət zorakılığı ilə halları ilə bağlı informasiya hazırlayarkən jurnalistlərin etik davranış qaydaları, həssas qruplarla ünsiyyət və müsahibə aparılması qaydaları barədə də məlumat verilib.
Təlimin yekununda BMT-nin Qadınlara qarşı ayrı-seçkiliyin aradan qaldırılması üzrə Komitəsinin üzvü, fəlsəfə dokroru Elgün Səfərov media nümayəndələrini və sosial media fəallarını gender problemlərinin həlli, zorakılığa qarşı mübarizə, qadın və uşaq hüquqlarının qorunması, Azərbaycanda ailə institutunun möhkəmləndirilməsi istiqamətində görülən işlərdə birgə əməkdaşlığa səsləyib.
Sonda jurnalistlərə və sosial media blogerləri nə təlimdə fəal iştiraka görə sertifikatlar təqdim olundu. Qeyd edək ki, mükafat alanlar arasında bu sətirlərin müəllifi də var.
Fidan SALMANLI
XQ
