"Yaşıl dünya naminə həmrəylik ili" ilə əlaqədar Naxçıvan Muxtar Respub­likasının Ekologiya və Təbii Sərvətlər, Gənclər və İdman nazirliklərinin birgə həyata keçirdiyi "Yaşıl dünya könül­lüləri” proqramının birinci mərhələsinə yekun vurulub. Bununla bağlı qurum rəhbərlərinin iştirakı ilə ETSN-də hesa­bat toplantısı keçirilib. 

Naxçıvan Muxtar Respublikasının gənclər və idman nazirinin müavini Mə­cid Seyidov, ekologiya və təbii sərvətlər naziri Xanlar Mustafayev ölkə başçısı­nın rəhbərliyi altında “Yaşıl dünya na­minə həmrəylik ili”, eləcə də COP29 ilə bağlı ölkəmizdə geniş iş aparıldığını vurğulayıb, ekosistemin qorunmasında gənclərin rolundan bəhs ediblər.

Məclisdə bildirilib ki, bu il martın 13-dən fəaliyyətə başlayan könüllü qrupu ötən dövr ərzində muxtar respublikada keçirilən elmi-praktiki konfranslarda, bir sıra sərgilərdə, “1 günə 100 min ağac əkək”, “Tullantıları tingə dəyiş” kimi ekoloji aksiyalarda, “Əkinçi bağı”nın sa­lınmasında ardıcıl iştirak ediblər. “Yaşıl dünya könüllüləri”nin həmrəylik yürüşü ilə cəmiyyətə ətraf mühitin mühafizəsi və ekosistemlə bağlı bilgilər, sosial me­sajlar ötürülüb. Könüllülər hazırladıq­ları müxtəlif məzmunlu qrafik posterlər sosial şəbəkə hesablarında yayımlan­maqla təbliğat və məlumatlandırma işi də aparıblar.

Müzakirələrdə “Ekoloji maariflən­dirmə və ətraf mühitin mühafizəsinə dəstək” İctimai Birliyininin üzvlərinin və könüllülərin təklifləri, fikirləri dinləni­lib. Sonda bir sıra tədbirlərin təşkilində göstərdiyi əməkdaşlığa görə ictimai biriliyin üzvlərinə təşəkkürnamə, könül­lülərə isə sertifikat təqdim edilib. 

Səbuhi HƏSƏNOV
XQ