52 saylı avtobus xəttini kim çökdürür?

“Sizin Azərbaycan Yerüstü Nəqliyyat Agentliyinin Vətəndaşlarla iş və Çağrı Mərkəzinə ünvanlanmış 52 nömrəli müntəzəm marşrutun fəaliyyəti barədə 22 dekabr 2023-cü il tarixli müraciətinizə tərəfimizdən baxılmışdır.

Qeyd edirik ki, sərnişin tələbatına uyğun olaraq 52 nömrəli müntəzəm marşrutda 4 avtobus 20 dəqiqə hərəkət intervalı ilə fəaliyyət göstə­rir. Lakin günün müəyyən saatların­da marşrutun hərəkət sxemi üzrə yollarda yaranan nəqliyyat sıxlığı avtobuslararası hərəkət intervalında ləngimələrə və avtobusların aralıq dayanacaq məntəqələrinə gecikmə ilə çatmalarına səbəb olur.

Buna baxmayaraq, müraciəti­niz əsasında marşrutun müvəqqəti istismarçısı olan “Xaliq Faiqoğlu” MMC-nin məsul şəxsinə xəbərdarlıq olaraq, sərnişindaşıma fəaliyyətləri­nin müvafiq qanunvericiliyin tələb­lərinə uyğun təşkil olunması, eləcə də sürücülərin təyin edilmiş hərəkət cədvəlinə riayət etmələrinə nəzarə­tin gücləndirilməsi tapşırılmışdır. Nəzərə almağınızı xahiş edirik”.

AYNA Publik Hüquqi Şəxsin İdarə Heyətinin sədr müavini Heydər Rüstə­movun imzası ilə “Xalq qəzeti”nə ünvan­lanan bu məktubu olduğu kimi oxucula­rın diqqətinə çatdırmağımız səbəbsiz deyil. AYNA-ya ünvanlanan müraciətin tarixinə (22 dekabr 2023-cü il) diqqət edin. Məktuba 17 yanvar 2024-cü ildə cavab hazırlanıb, 29 yanvar 2024-cü ildə redaksiyaya daxil olub. 

Buna qədər agentliyin redaksiyaya cavab məktubunda adı keçən şirkətə müraciət edib 52 saylı marşrut xəttində cəmi 2 avtobusun fəaliyyət göstərdiyini, ərazidə yaşayanların əziyyət çəkdiyini bildirmişdik. 40 – 50 dəqiqə intervalla şəhər içində marşrut işləyərmi? Şirkətə etdiyimiz telefon zənginə Asif adlı şəxs, az qala, hər gün istifadə etdiyimiz mar­şrutla bağlı şikayətin düzgün olmadığı­nı sübut etməyə çalışdı. O, redaksiya­ya şikayət edənlərin haqsız olduğunu dönə-dönə təkrarladı. Xəttə hər gün 4 avtobusun çıxdığını dedi. Biləndə ki, həmin marşrutun əziyyət çəkən sərni­şinlərindən biri də bizik, sərnişin azlığını əsas gətirdi. 

Əslində, bu, əsassız bəhanədir. 52 saylı xətdə avtobusda yetərincə sıx­lıq olur. 6-cı mikrorayonun bir hissəsi, 4-cü mikrorayon, ətraf məhəllələrin sa­kinləri o qədər də az deyil. Avtobuslar müntəzəm işləmədiyindən əhali 800 – 1000 metr piyada yol qət edib bir his­səsi 85, bir hissəsi isə 79 nömrəli mar­ştutlarla işə tələsirlər. İndi yeganə 52 saylı marşrutun ümidinə qalan çoxsaylı sərnişinlərə vaxtilə sonuncu dayana­caqdan müxtəlif istiqamətlərə 52 saylı marşrutdan əlavə, 116, 13, 122 nömrəli xətlərin avtobusları da xidmət edirdi.

AYNA-dan aldığımız cavabdan son­ra qurumla əlaqə saxladıq. Aprelin 4-də 050-212-04-... nömrəli telefonla göndə­rilən cavabın həqiqəti əks etdirmədiyini, şirkətin agentliyə qeyri-düzgün məlumat verdiyini bildirdik. Xəttin o başındakı xa­nım müraciətimizi Heydər Rüstəmova məruzə edəcəyini bildirdi. Bundan son­ra davamlı olaraq aprelin 5-də, 24-də, mayın 7-də və son dəfə iyunun 14-də agentliyə müraciətlər etmişik. Hətta işə gedərkən avtobusdakı sıxlığı da tele­fonla çəkib sübut üçün göndərmişik. Telefon danışıqlarımızın birində –ap­relin 26-da marşrut xəttinə lap tezliklə 1 avtobus da əlavə ediləcəyini, hətta, əraziyə yeni marşrut verilməsi barədə düşündüklərini bildirdilər. Bu vəddən də 2 aydan çox keçib.

6 ay problemin həllini səbrlə göz­ləyəndən sonra yenə sözümüz AY­NA-yadır: “Xaliq Faiqoğlu” şirkətinin sizə qeyri-dürüst məlumat verdiyini bildiniz. Bizə yazdığınız cavaba görə, şirkətə xəbərdarlıq da etmisiniz. Bəs nəticə niyə yoxdur? Kim kimi aldadır? Şirkət bizə də, sizə də yalan vəd verib. Siz də o vədə inanıb bizə cavab vermi­siniz, eləmi? Nəticədə aldadılan sərni­şindir, əhalidir.

Vaxtilə bu xətt paytaxtın ən işlək, nümunəvi marşrutlarından biri idi. O vaxt avtobuslar arasında interval 4 – 5 dəqiqə idisə, indi 40 – 50 dəqiqədir. 10 dəfə geriləmənin səbəbi nədir? Bu sua­la cavab gözləyirik.

P.S: İyulun 1-dən gediş haqları­nın 50 qəpiyə qaldırılması, şübhə­siz paytaxtda sərnişin nəqliyyatının nöqsanlarını aradan qaldırmağa kömək edəcək. İnanırıq ki, sürü­şüb düşən oturacağı olan, köhnə, yarıyolda nasazlıq səbəbindən da­yanan, sərnişinləri arxadan gələn başqa marşruta əyləşən 52 saylı marşrutda da indiki biabırçılığa son qoyulacaq.

Zərifə BƏŞİRQIZI
XQ