SAMUX

Samux rayonunda XXI əsrin ilk Milli Qəhrəmanı Eltun Xaləddin oğlu İsgəndərovun anım günü qeyd edilib.

Tədbir iştirakçıları Samux Rayon Əhmədbəyli kənd şəhid­ləri qəbiristanlığında Milli Qəhrəmanın qəbrini ziyarət edərək üzərinə tər-qərənfillər düzüblər. Daha sonra rayon icra hakimiy­yətinin başçısı Firdovsi Əliyev çıxış edərək deyib ki, 2009-cu il iyunun 18-də Cəlilabad rayonu istiqamətində sərhəd pozucuları ilə döyüşə girən həmyerlimiz bir neçə nəfəri məhv etdikdən son­ra, sərhəd pozucularının birinin sərhədçilərimizin cəm dayandığı mövqeyə qumbara atdığını görüb və dərhal qumbaranın üzərinə atılaraq öz həyatı bahasına əsgər və zabitlərimizi xilas edib. El­tun bu hərəkəti ilə Azərbaycan oğullarının Vətən uğrunda lazım gələrsə, canlarından keçə biləcəyini sübut edərək, gənc nəsil­lərə nümunə olmuşdur. 

Azərbaycan Respublikasının Prezidenti əsgərimizin göstər­diyi bu şücaəti nəzərə alaraq 25 iyun 2009-cu il tarixli sərənca­mı ilə İsgəndərov Eltun Xaləddin oğluna ölümündən sonra Milli Qəhrəman adını verib.

Tədbirdə iştirak edən Xaləddin İsgəndərov oğlunun göstər­miş olduğu qəhrəmanlığı ilə fəxr etdiyini, Eltun kimi vətənpər­vər oğulların sayının minlərlə olduğunu vurğulayıb. Göstərilən diqqət və qayğıya görə ölkə başçısı cənab İlham Əliyevə öz minnətdarlığını bildirib.

NAFTALAN

Yaxın vaxtlarda Naftalanda daha bir yeni müalicə mərkə­zi istifadəyə veriləcək. 

Respublikanın digər bölgələrində olduğu kimi, Naftalan şəhərində də sahibkarlıq gündən-günə inkişaf edir. Beləliklə də yeni açılan iş yerlərinin sayı artır, əhalinin sosial rifah halı daha da yaxşılaşır.

Beynəlxalq Turizm Mərkəzi hesab edilən Naftalanda sahi­bkarlara geniş imkanlar yaradılmışdır. Həm hotel və istirahət, həm də müalicə mərkəzi kimi Naftalana üz tutan yerli və xarici turistlərə yüksək səviyyəli xidmət göstərilməsi məqsədilə bura­da hər cür şərait yaradılıb.

Bu günlərdə şəhər icra hakimiyyətinin başçısı Vüqar Novru­zov tikintisində son tamamlama işləri görülən “Naftalan Hotel”ə baş çəkib, aidiyyəti üzrə fikir və tövsiyələrini bildirib.

AĞSTAFA

Ağstafalı şəhidlərimizin ailə üzvləri ilə növbəti görüş keçirilib. Rayon icra hakimiyyəti başçısı aparatının inzibati binasında təşkil olunan görüşdə 50 nəfərdən çox şəhid ailə­sinin üzvü iştirak edib.

Əvvəlcə xalqımızın ümummilli lideri Heydər Əliyevin və Vətən uğrunda canından keçən şəhidlərimizin xatirəsi bir dəqiqəlik sükutla yad edilib.

Sonra RİH başçısı Seymur Orucov, rayon prokuroru Anar Cəfərov, polis şöbəsinin rəisi Vüqar Xəlilov çıxış edərək Pre­zident İlham Əliyevin rəhbərliyi ilə ölkəmizdə şəhid ailələrinə, müharibə veteranlarına və qazilərə göstərilən yüksək diqqət və qayğıdan söz açıblar. Qeyd olunub ki, dövlətimizin başçısı həssas təbəqədən olan vətəndaşlarımızın problemlərinin həllini bütün dövlət qurumları qarşısında bir nömrəli vəzifə kimi müəy­yən edib. 

Görüşdə çıxış edən şəhid valideynlərindən Azər Abbasov, Aydın Mehdizadə, Zeynəb Sadıqova, Afət Namazova, Nazim Yusifov, Nizami Yolçuyev, Bayram Ələkbərov, Yasəmən Qur­banova, Xatirə Əlizadə, İlqar Quliyev, Aybəniz Əhmədova və şəhid qızı Nəcmiyyə Sədizadə şəhid adının əbədiləşdirilmə­si məqsədi ilə görülən tədbirlərdən, müharibə əlilləri və şəhid ailələrinin mənzil – məişət şəraitinin yaxşılaşdırılması üçün fər­di və çoxmənzilli yaşayış binalarının tikilib istifadəyə verilməsi, eləcə də bu kateqoriyadan olan insanların avtomobillərlə təmin olunmasından söz açıb, icra olunan ardıcıl tədbirlərə, onlara göstərilən xüsusi diqqət və qayğıya görə Prezident İlham Əliyev və Birinci vitse-prezident Mehriban xanım Əlievaya dərin min­nətdarlıqlarını bildiriblər.

H.QASIMOV,
XQ-nin bölgə müxbiri