Göyçay rayonundakı Heydər Əliyev Mərkəzində dünya şöhrətli alim, Əmək­dar elm xadimi, akademik, Zərifə xanım Əliyevanın doğum günü böyük ehtiram­la anılıb. 

Dəyirmi masa ətrafında keçirilən mə­rasimdə rayon icra hakimiyyəti başçısı­nın müavini Zivər Zeynalova, YAP rayon təşkilatının sədri Sahib Şükürov, Göy­çay Rayon Mərkəzi Xəstəxanası Publik Hüquqi Şəxsin həkimləri və ictimaiyyət nümayəndələri iştirak ediblər.

Çıxışlarda bildirilib ki, görkəmli döv­lət və elm xadimi Əziz Əliyevin ailəsində dünyaya göz açan Zərifə xanım valideyn­lərinə layiqli övlad, tanınmış həkim, qay­ğıkeş insan idi. O, Azərbaycan dövlətinin memarı və qurucusu, bütün mənalı öm­rünü Vətənin və xalqının tərəqqisinə həsr etmiş dahi şəxsiyyətin – ümummilli lider Heydər Əliyevin vəfalı ömür-gün yolda­şı, sədaqətli dostu və etibarlı silahdaşı olmuşdur.

Zərifə Əliyeva xatırlananda həm də göz önündə nəcib bir Azərbaycan xanı­mının obrazının canlandığı vurğulanıb. İftixarla qeyd edilib ki, Zərifə xanımın bir qadın və ana kimi xalqımıza ən bö­yük xidməti müasir, müstəqil dövlətimizin daha da inkişaf edib çiçəklənməsinə, dünyada layiqli yer tutmasına nail olan möhtərəm Prezidentimiz İlham Əliyevi Azərbaycana bəxş etməsidir. 

Natiqlər bildiriblər ki, dünya oftalmo­logiya elminə böyük töhfələr vermiş Zə­rifə xanım Əliyevanın zəngin elmi irsi, apardığı tədqiqatlar, qazandığı nailiyyət­lər, yaratdığı fundamental əsərlər Azər­baycan tibb elminin parlaq səhifələrini təşkil edir. Görkəmli alimin keçdiyi şərəfli ömür yolu hər bir azərbaycanlı, hər bir alim və həkim üçün həyat və mənəviyyat dərsi, kamillik və müdriklik məktəbidir.

Sonda Zərifə xanım Əliyevaya həsr edilmiş videoçarx nümayiş edilib, mək­təblilər şeirlər söyləyiblər. 

İlqar HƏSƏNOV,
XQ-nin bölgə müxbiri