Aprelin 19-da Lerik Rayon İcra Hakimiyyətinin təşkilatçılığı ilə rayon Mədəniy­yət Mərkəzində Əməkdar jurnalist İlqar Rüstəmovun şəhidlərimizin xatirəsinə həsr etdiyi "Sizi kim unudar..." kitabının təqdimat mərasimi keçirilib. 

Təqdimat mərasimi şəhidlərimizin əziz xatirəsinin anılması ilə başlandı. Sonra tədbirin aparıcısı AJB-nin üzvü Hüsaməddin Abbasov kitabın müəllifi haqqında məlumat verərək bildirdi ki, İlqar Rüstəmov milli mətbuatın inkişafın­dakı xidmətlərinə görə Azərbaycan Res­publikası Prezidentinin sərəncamları ilə “Tərəqqi” medalı və “Əməkdar jurnalist” fəxri adı ilə təltif edilib. Dövlət başçısının bu il fevralın 2-də imzaladığı sərəncamla isə o, “Heydər Əliyevin 100 illiyi (1923–2023)” yubiley medalına layiq görülüb. Bu il işıq üzü görən, şəhidlər və qazilər haqqında oçerklərin və “Şəhid anası” poemasının yer aldığı yeni toplu İlqar Rüstəmovun sayca 3-cü kitabıdır. Uzun illərdən bəri “Xalq qəzeti”nin məsul katibi vəzifəsində çalışan müəllifin Ulu öndər Heydər Əliyevin hakimiyyətdə olduğu dönəmlərdə Azərbaycanda milliləşmə, erməni separatizmi ilə mübarizə, kadr siyasəti və respublikanın sosial-iqtisadi inkişafı naminə həyata keçirdiyi müstəs­na xidmətlərinin bir çox məqamların­dan bəhs edən sanballı “Heydər Əliyev xatirələr işığında” kitabı da 2023-cü ildə nəşr olunub. 

Lerik Rayon İcra Hakimiyyətinin baş­çısı Əkbər Abbasov Prezident, müzəf­fər Ali Baş Komandan, İlham Əliyevin rəhbərliyi altında Zəfər tariximizin 44 günlük salnaməsini qanları ilə yazan igid əsgər və zabitlərimizin döyüş yoluna həsr olunmuş bu kitabın gənclərin hər­bi-vətənpərvərlik tərbiyəsində önəmli rol oynayacağını bildirdi. Natiq dedi: “Bu ki­tabın özünəməxsusluğu ondadır ki, bura­da adı çəkilən hər bir şəhidin və qazinin ömür yolu, qalib əsgər kimi formalaşdığı uşaqlıq illəri və həyatlarının ibrətamiz məqamları öz əksini tapıb”. 

Mərasimdə ziyalı Məzahir Ağayev, politoloq Arzuman Muradlı, iş adamı Ehtiram Miriyev, Rövşən Rəhmanov, Nizam Babayev, həmçinin Balaşirin Nəsirov, Gültəkin Şıxəliyeva, tanınmış şairlər Ağacəfər Həsənli, Xanlar Həmid və başqaları müəllifin 12 şəhid, 2 qazi və 30-dən çox əsgəri əlil olmaqdan xilas edən hərbi həkim haqqında ürək yanğı­sı və məhəbbətlə yazdığı oçerklərin hər birinin bir filmin, bir televiziya tamaşası­nın mövzusu ola biləcəyini qeyd etdilər. Əminlik ifadə olundu ki, İlqar Rüstəmov bu mövzuda oxucularını yeni əsərləri ilə sevindirəcək. 

Şəhid valideynləri Rəbbil Heydərov, Hüseynverdi Rəhmətov, Mükafat Yaqu­bov, ehtiyatda olan polkovnik Əbülfət Həmidov, Aslan Hüseynov və qazi polko­vnik-leytenant Ramin Əliyev çıxışlarında müəllifə minnətdarlıqlarını bildirib qeyd etdilər ki, belə əsərlərin əsas məramı şə­hidlərimizin adlarının əbədiləşdirilməsi, onları şərəfli döyüş yolunun və vətənpər­vərlik nümunəsinin gələcək nəsillərə çat­dırılmasıdır. Müəllif bunun öhdəsindən uğurla gəlib.

Təqdimat mərasimində orta məktəb şagirdləri kitabda yer alan “Sizi kim unu­dar...” elegiyasından və “Şəhid anası” poemasından parçalar söylədilər. 

Sonda kitabın müəllifi, Əməkdar jur­nalist İlqar Rüstəmov tədbirin təşkilatçıla­rına minnətdarlığını ifadə edərək bidirdi ki, bütün yazarların, qələm sahiblərinin şəhid və qazilərimiz qarşısında böyük mənəvi borcu var – onların qəhrəman­lıqlarını əbədiləşdirmək və gələcək nəsil­lərə çatdırmaq borcu. “Bu kitab da mənim haqqında yazdığım 12 qəhrəmanlara borcumun bir qismidir. “Şəhid anası” poe­mam isə igid oğulları Azərbaycana bəxş edən analara olan borcumdur. Mən bunu onlara həsr etdiyim elegiyada da yazmı­şam: “...Neçə vaxtdı yanınızda xəciləm. Şəkillərinizə baxıb, içim qançır ola-ola qalıram. Sizin ucaldığınız zirvəyə yük­sələ biləcək söz tapmıram yazmağa. Elə içimə çəkilib özümün söz acizliyimə acı­mağa gücüm çatır. Heç olmasa, bu işdə azacıq da olsa, sizə oxşamaq istəyirəm. Sözü sizin qalxdığınız zirvəyə ucaltmaq istəyirəm. Sizin yolunuzda sözün şəhidi olmaq istəyirəm. Bu dürr dəryasından adınıza, şücaətinizə dəyər verə biləcək inci tapmaq, sizin Vətəni candan uca tutan eşqinizi mədh etmək istəyirəm...” Bacarmışam, ya yox – bunu oxucular deyəcək.

İlqar Rüstəmovun “Sizi kim unudar...” kitabının Lerik rayonunun Çayrud və Vizəzəmin kəndlərində təqdimatı da ma­raqla qarşılanıb. Müəllif Çayrud kənd ziyalıları ilə birlikdə əvvəlcə Vətən müha­ribəsində şəhid olan Cavanşır Həmodo­vun məzarını ziyarət edib. Sonra şəhidin oxuduğu doğma Çayrud kənd orta mək­təbində təqdimat mərasimi keçirilib. Şə­hidin valideyni Namiq Həmidov müəllifə minnətdarlıq edərək bildirib ki, bu, onun ailəsi üçün çox dəyərli kitabdır və şəhi­din ev muzeyinin ən qiymətli eksponatları arasında yer alacaq. 

Vizəzəmin kəndində isə təqdimat “Zəfər parkı”nda açıq havada keçirilib. Tədbirdə bu kənddə böyüyüb boya-başa çatmış şəhidlər – XTQ-nin giziri Tərzan Həşimov və tankçı baş gizir Cəlal Ağaye­vin qəhrəmanlıqları haqqında söhbət açı­lıb, onların xalqımızın yaddaşında əbədi yaşayacaqları qeyd edilib. 

Hər üç açılışda müəllif İlqar Rüstə­mov şəhid ailələrinə, onların yaxınlarına, tədbirdə iştirak edən ziyalılara və gənc­lərə 100-ə yaxın kitab hədiyyə edib. 

Qabil ƏLİYEV
XQ