Azərbaycan Ordusunun ötən ilin sentyabrında keçirdiyi birgünlük antiterror tədbirləri nəticəsində Xocalı şəhəri separatçılardan təmizlənib. İşğaldan azad olunmuş bütün əraziləri kimi, Xocalı şəhərində də təmir-bərpa işlərinə başlanılıb. Hava şəraitinin soyuq keçməsinə baxmayaraq, gecə saatlarına qədər işlər davam edir. İnşaatçılar arasında xocalılar da var.
Hazırda şəhərdə çox sayda tikinti şirkəti fəaliyyət göstərir və hər şirkətin cavabdeh olduğu məhəllələr də var. Bu şirkətlərdən biri “MİDA” MMC-dir. “MİDA” 8,5 milyon manatlıq müqaviləyə əsasən, Xocalı şəhərində 3,34 hektar ərazidə yerləşən 15 çoxmənzilli yaşayış binasının əsaslı təmiri və ərazinin abadlaşdırılması işlərini həyata keçiririr. Digər şirkət isə “Bakı Abadlıq Xidməti” MMC-dir. Firma Xocalı şəhərinin bərpa və yenidən qurulmasında yaxından iştirak edir. Bundan başqa, qurum Kərkicahan qəsəbəsi, Malıbəyli və Turşsu kəndlərinin bərpasına da cavabdehdir. Adı çəkilən yaşayış məntəqələrinin bərpası və yenidən qurulması tədbirlərinə başlamaq məqsədilə şirkətlə 152 milyon 247 min 600 manat məbləğində müqavilə imzalanıb.
“Bakı Abadlıq Xidməti” MMC-nin memarı Elnur Abdullayev bildirib ki, hazırda Xocalı şəhərinin ərazisində 283 fərdi evdə əsaslı bərpa-quruculuq işləri görülür. “Fərdi evlərlə yanaşı, şəhərin infrastrukturu da yenidən qurulur. Artıq rabitə, elektrik, içməli su, kanalizasiya və digər daşıyıcı xətlərin çəkilişi yekunlaşıb, ev birləşmələri işi aparılır.
Xocalı şəhəri dağıntılarla bərabər, ekoloji terrora da məruz qalıb. Yabanı bitkilərdən, məişət tullantılarından təmizləmə işləri də davam edir. Tullantıların yığılması üçün 10 hektar sahədə poliqon yaradılacaq.
Təmir-bərpa işləri ilə yanaşı, Xocalı ətrafındakı meşəlik ərazilər də minalardan təmizlənir. Bu da onu göstərir ki, təmir-bərpa işləri daha geniş əraziləri əhatə edəcək. Onların rabitə və internetlə bağlı heç bir problemləri olmayacaq. Çünki “Azercell Telekom” MMC Xocalıda baza stansiyalarını işə salıb. İndiyədək şəhərdə internet magistral xətti və genişzolaqlı internet şəbəkəsinin yaradılması təmin edilib.
Bu ildən şəhərin bərpa-tikinti qrafikinə uyğun olaraq mərhələli formada inşa edilmiş evlərə ailələrin köçürülməsi həyata keçiriləcək. Xocalılar tamamilə yenilənmiş, zəruri yaşayış şəraitinin yaradıldığı evlərdə məskunlaşacaqlar.
Beləliklə, vaxtilə soyqırımı və dağıntılara məruz qoyulan Xocalının azad olunması və dərhal bərpasına başlanılması mənəvi baxımından çox böyük əhəmiyyət daşıyır. 32 ildən sonra xocalılar doğma şəhərlərində gələcəyə böyük ümidlərlə öz həyatlarını davam etdirəcəklər.
Pünhan ƏFƏNDİYEV
XQ
