Dağlıq Şirvan Regional Gənclər və İdman İdarəsi əhatə etdiyi bölgələrdə dövlət gənclər siyasətinin uğurla həyata keçirilməsi üçün ciddi səylər göstərir. Əlamətdar günlər və tarixi hadisələrin ildönümləri, idman yarışları və gənclər arasında müxtəlif maraqlı müsabiqələrin keçirilirməsi ənənə halını alıb.
Hər il 2 Fevral Azərbaycan Gəncləri Günü ilə bağlı təşkil olunan tədbirlər də bu qəbildəndir. Bu bayramda keçilən yola nəzər salınır, uğurlar xatırlanır, fəal gənclər mükafatlandırılırlar. Bütün bunlar sabahımızın sahibləri olan gənclərin inkişafına stimul verir, onları daha parlaq nailiyyətlərə ruhlandırır.
Ötən il region gənclərinin ictimai həyatda fəallığı daha da yüksək olub. “Heydər Əliyev İli” çərçivəsində keçirilən esse, rəsm, bədii qiraət müsabiqələri, gənclər üçün əyləncəli proqramlar, həmçinin soyqırımı və faciə qurbanlarının xatirəsinin yad edilməsi məqsədilə təşkil olunan fləşmoblar, sənədli filmlərin nümayişi yaddaqalan tədbirlərdəndir. İl ərzində “Şahin” hərbi-idman oyunları üzrə respublika birinciliyində İsmayıllı rayon Diyallı kənd tam orta məktəbi komandasının qalibiyyət əldə edərək 1-ci yeri qazanması rayon gənclərinin ən uğurlu nəticələrindən hesab edilə bilər.
Dağlıq Şirvan Regional Gənclər və İdman İdarəsinin təşkilatçılığı ilə region gənclərinin cəmiyyət həyatına fəal inteqrasiyası, sosiallaşması məqsədilə Qobustan rayonunda “Region Gənclərinin Festivalı” keçirilib. Cari ildə Bakı şəhərində keçirilən “GəncFest”, “Həmrəylik” kimi festivallarda region gənclərinin iştirakı təmin edilib və onlar layiqli şəkildə təmsil olunublar.
Gənclər arasında maarifləndirmə və təbliğat işləri mütəmadi olaraq aparılıb, asudə vaxtın səmərəli təşkili məqsədilə günərzi yay düşərgələri təşkil edilib. Həmçinin ağacəkmə aksiyası çərçivəsində sağlam həyat tərzinin təbliği işinə də xüsusi diqqət ayrılıb.
Region gəncləri idman sahəsində də sanballı uğurları ilə fərqləniblər. Belə ki, 2023-cü ildə Belarusda keçirilən II MDB oyunlarında İsmayıllı cüdoçusu Ayxan Mirzəzadə və qobustanlı gənc ağırlıqqaldıran Dadaş Dadaşbəyli qızıl medallar qazanıblar. Qeyd edək ki, idman yarışlarında tək oğlanların deyil, qızların da fərəhli nailiyyətləri var. İsmayıllı rayonunun gənc atletləri Selcan Qarayeva və Mələk Hüseynli ötən il ağır atletika üzrə gənclər arasında ölkə birinciliyində fəxri kürsünün ən yüksək pilləsinə qalxıblar.
Dağlıq Şirvan Regional Gənclər və İdman İdarəsinin kollektivi öz bayramını belə gözəl nailiyyətlərlə qarşılayıb. Ötən illərdə əldə edilən uğurlar məhz idarənin yüksək təşkilatçılığının və öz vətənpərvərlikləri ilə seçilən bölgə gənclərinin əzmkarlığının nəticəsidir.
İlqar HƏSƏNOV,
XQ-nin bölgə müxbiri
İsmayıllı
