BP-nin ingilis dilində nəşr etdiyi bu kitab “Mədəni İrs” forumunun iştirakçılarına təqdim olunub

Xalçaçılıq sənəti əsrlər boyu Azərbaycanın milli mənsubiyyətini və milli dəyərlərini təmsil edən bir sənət növü kimi tanınır. Bakıda keçirilən “Mədəni İrs” forumu çərçivəsində Heydər Əliyev Fondu və BP şirkəti Azərbaycanın mədəni irsinin rəmzlərindən olan xalça sənətinə həsr edilən “Azərbaycan xalçaları – ilmələrin rəqsi” kitabının ingilis dilində nəşrini təqdim edib. 

Mədəniyyət Nazirliyi və Heydər Əliyev Fondunun təş­kilatçılığı ilə ümummilli lider Heydər Əliyevin 100 illik yu­bileyi çərçivəsində keçirilən “Mədəni İrs” forumunda çıxış edən BP-nin Xəzər regionun­da kommunikasiya və xarici əlaqələr üzrə vitse-prezidenti Bəxtiyar Aslanbəyli bildirib ki, şirkət Azərbaycanın uzunmüd­dətli və etibarlı tərəfdaşı kimi həmişə ölkənin zəngin mədə­ni irsinin və milli dəyərlərinin təbliğinə yönəlmiş təşəbbüsləri, fəaliyyətləri dəstəkləyib. “Biz Azərbaycanda hələ uzun müddət olacağıq və ölkənin iqtisadi, so­sial və mədəni həyatında yaxın­dan iştirak edəcəyik. İnanırıq ki, bu gözəl nəşr unikal bir sənət xəzinəsidir və dünya mədəni irsinə əvəzsiz bir töhfədir. Bu möhtəşəm layihəyə qoşulmaq imkanı yaratdığına görə Heydər Əliyev Fonduna təşəkkür edi­rik”, – deyə o əlavə edib.

Xatırladaq ki, Azərbaycan dilində nəşr və eyniadlı xalça kolleksiyasından ibarət sər­gi 2022-ci ildə Heydər Əliyev Mərkəzində təqdim edilib. BP-nin təşkilatı dəstəyi ilə isə kitab ingilis dilində hazırlanaraq nəşr olunub. Şirkət kitabın nəşri ilə bağlı layihəni Azərbaycanın zəngin və qədim tarixini, mənə­vi dəyərlərini, füsunkar mədəni irsini və möhtəşəm incəsənət xə­zinəsini təbliğ etmək öhdəliyinin bir hissəsi olaraq dəstəkləyib.

Nəşrdə hər bir xalçanın təs­viri fərqləndirici xüsusiyyətləri haqqında müfəssəl məlumat­larla müşayiət olunur. Bundan əlavə, kitaba layihə, Azərbaycan xalçaçılıq sənətinin tarixi, əsas istiqamətləri və texnikası, həm­çinin bu ecazkar layihənin ilham qaynağı olmuş memarlıq və mə­dəniyyət möcüzələri haqqında məlumatlar daxil edilib. Nəşrə daxil olan xalçaların hazırlanma­sında 6 rəssam və 14 xalçaçı iş­tirak edib. Heydər Əliyev Fondu tərəfindən hazırlanan layihə çər­çivəsindəki xalçalar 8 il ərzində təbii boyalarla rənglənmiş ipək və yun iplərdən toxunub. 

Yeri gəlmişkən, Azərbay­canda 31 ildir fəaliyyət göstərən BP şirkəti neft və qazın kəşfiy­yatı, işlənməsi və nəqli üzrə iri layihələrin icrasını təhlükəsiz, səmərəli və etibarlı şəkildə hə­yata keçirməklə ötən müddətdə tərəfdaşları ilə birlikdə ölkədə icraçısı olduğu layihələrə təx­minən 84 milyard dollar sərmayə qoyub. Bununla yanaşı, şirkətin ölkəmizdə həyata keçirdiyi geniş sosial sərmayə fəaliyyətləri və bacarıqların inkişaf etdirilməsi istiqamətindəki səyləri insanlara əhəmiyyətli faydalar gətirməklə, onların həyatını yaxşılaşdırıb. Bütövlükdə isə, fəaliyyətə baş­ladığı vaxtdan indiyədək BP özü və onun əməliyyatçısı olduğu birgə layihələrdəki tərəfdaşları adından ölkədəki sosial sərmayə layihələrinə, ümumilikdə, təq­ribən 109 milyon ABŞ dolları xərcləyib. 

XQ