Sumqayıt Dövlət Rəsm Qalereyası və AYB Sumqayıt bölməsinin birgə təşkilatçılığı ilə gənclik şəhərindəki Heydər Əliyev Mərkəzində şəhidlərimizin şəxsi əşyalarından ibarət “Sizi xatırladır” adlı sərgi-kompozisiya təqdim olundu. 

Mərasimdə şəhid ailələrinin üzvləri, əbədiyyətə qovuşmuş qəhrəmanlarımıza ədəbi nümunələr həsr edən şair və ya­zıçılar, ictimaiyyət nümayəndələri iştirak edirdilər.

Öncə sərgiyə baxış keçirildi. Eks­pozisiyada tanınmış rəssamların Zəfər mövzulu əsərləri ilə yanaşı, şəhidlərə aid əşyaların da nümayiş etdirilməsi tədbirə kövrək notlar qatırdı. Milli qəhrəmanlar Polad Həşimovun, Qorxmaz Eyvazovun, eləcə də digər şəhidlərin hərbi libasları, süngüləri, qeyd dəftərləri, qol saatları, şəxsi sənədləri, fotoşəkilləri və s. onların haqqında həzin xatirələr “pıçıldayırdı”... 

Təqdimat Azərbaycan Dövlət himni­nin səsləndirilməsi ilə başlandı. Sonra Ulu öndər Heydər Əliyevin və Azərbay­canın ərazi bütövlüyü uğrunda canlarını fəda etmiş Vətən oğullarının xatirəsi 1 dəqiqəlik sükutla yad edildi.

AYB Sumqayıt bölməsinin sədri Gül­narə Cəmaləddin Birinci Qarabağ müha­ribəsi, Aprel döyüşləri, 44 günlük Vətən müharibəsi və antiterror tədbirləri barədə danışdı. Dövlət Rəsm Qalereyasının mü­diri Ellada Həsənova tədbirin mahiyyəti haqqında iştirakçılara məlumat verdi. Ardınca AYB üzvü olan sumqayıtlı şair­lər şəhidlərin fotoları yerləşdirilmiş çərçi­vələrə həkk olunmuş adlı şeirləri səslən­dirdilər. Yığcam poetik nümunələrdə hər bir şəhidin həyat yolu, məramı, arzuları ifadə olunmuşdu. Şeirlər oxunduqca çər­çivəli portretlərlə bərabər şəhidlərin ailə üzvlərinə təqdim edildi. Maraqlı idi ki, çıxışlar şəhid Toğrul Hacıyevdən əmanət qalmış tarda çalınan musiqi melodiyaları ilə müşayiət edilirdi. 

Sonda şəhid valideynləri çıxış edərək tədbirin təşkilatçılarına, şəhidlərimizi daim yad edən, onların ruhuna sayğı göstərən şəhər rəhbərliyinə, Abşeron–Xızı Regional Mədəniyyət İdarəsinə təşəkkürlərini bildirdilər.

Əli NƏCƏFXANLI
XQ