Dünən nüfuzlu media xadimi, Azərbaycanın ilk poliqrafçı alimi Şəddat Cəfərov 83 illik ömrünün 70 ilə yaxın bir dövrünü əhatə edən “Əzəldən sözə bağlıyam” adlı sənədli-xronikal, bədii-publisistik beşcildliyinin yenicə işıq üzü görmüş ilk 2 kitabını “Xalq qəzeti”nin kollektivinə təqdim etdi.

Qocaman poliqrafçı və yazıçını salamalayan “Xalq qəzeti”nin baş re­daktoru Əflatun Amaşov redaksiya­mızın çoxillik dostunun yaşının ahıl vaxtında da naşirlik fəaliyyətini davam etdirməklə yanaşı, fəal bədii-sənədli yaradıcılıqla da məşğul olmasını nadir bir nümunə kimi dəyərləndirdi. O bildirdi ki, Şəddat müəllim uzun illər ölkənin bir sıra iri poliqrafiya müəssisələrinə peşə­kar rəhbərliyi ilə milli mediamızın və ki­tab mədəniyyətinin inkişafına samballı töhfələr verib. Baş redaktor orijinal me­dia salnaməsinin müəllifini yaradıcılıq uğuru münasibətilə səmimi təbrik etdi, ona möhkəm cansağlığı, yeni uğurlar arzuladı.

Qəzetimizin keçmiş əməkdaşı, vete­ran jurnalist Hacı Mehman Fərzullayev qeyd etdi ki, müstəqilliyin ilk illərində qə­zet-jurnalların çətinliklə işıq üzü gördüyü bir vaxtda Şəddat Cəfərov keçmiş itti­faqın poliqrafiya və kağız sənayesi sis­temindəki nüfuzundan istifadə edərək mətbəələrin tələbatının ödənilməsinə çalışıb. O dövri nəşrlərin, eləcə də qə­zetimizin texniki təchizatına və davam­lı olaraq işıq üzü görməsinə öz təsirli köməyini göstərib. Digər əməkdaşlar da Şəddat Cəfərovun yüksək ziyalı və peşəkarlıq keyfiyyətlərini vurğuladılar, onun bədii-sənədli yaradıcılığının dava­mı olan yeni çoxcildliyin çağdaş media tariximiz üçün önəmli bir qaynağa çev­riləcəyini söylədilər.

Qəzet-kitab nəşrini həyatının mə­nası bilən ustad poliqrafçı Şəddat Cəfərov həmişə sözə yüksək dəyər verdiyini, özü də fəal yaradıcılıqla məş­ğul olduğunu söylədi. Qonaq bildirdi ki, çoxillik müşahidələri və sistemli qeydlərinə əsaslanaraq, mediamızın 7 onillik tarixinin bir çox önəmli fakt və hadisələri barədə son illər qələmə aldığı yazılar artıq 5 cildə çatıb. Yazı­çı-alim bu sənədli materialların indiki və gələcək nəsil üçün gərəkli olduğunu nəzərə alıb onları kitab şəklində nəşr etməyi qərara alıb. O, ilk 2 kitabı ən sevimli qəzetinin redaksiyasına – “Xalq qəzeti”nin kollektivinə təqdim etməkdə məqsədini belə açıqladı: “Həyatımın çox qiymətli bir məhsulunu – iştirakçısı və şahidi olduğum çoxillik jurnalistika təəssüratımın toplusununu “Xalq qə­zeti”nə hədiyyə etmək elə xalqa ərmə­ğan etmək anlamı daşıyır”. 

Sonra Şəddat Cəfərov yeni kitabının nüsxələrini redaksiya əməkdaşlarına hədiyyə etdi.

Tahir AYDINOĞLU
XQ