Oktyabrın 20-də Sumqayıt Dövlət Universitetinin Böyük Akt zalında Vətən müharibəsində şəhidlik zirvəsinə ucalan Vüsal Muradov və Azad Hümbətovun xatirəsinə həsr olunmuş “Vətən yolunda addımlayanlar” filminin təqdimatı keçirildi.

Təqdimatdan əvvəl Azərbaycan Respublikasının Dövlət Himni səsləndirildi. Ölkəmizin ərazi bütövlüyü uğrunda canlarından keçən şəhidlərin xatirəsi bir dəqiqəlik sükutla yad edildi.

Daha sonra Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “Şəhid Ailələrinə Qayğı Cəmiyyəti”nin təşkilatçılığı ilə “Vətən yolunda addımlayanlar” filminin təqdimatı oldu.

Təqdimatdan sonra Şəhid Ailələrinə Qayğı Cəmiyyətinin sədri Müşfiq Əliyev filmin təqdimatı zamanı göstərdiyi dəstəyə görə SDU-nun  rektoru cənab Rüfət Əzizova və universitetin professor-müəllim, tələbə heyətinə təşəkkürünü bildirdi. Sədr filmin nümayişinin Bakı şəhərində və respublikamızın digər bölgələrində də keçiriləcəyini diqqətə çatdırdı. 

Çıxış edən Vətən müharibəsi qəhrəmanının atası Arif Hümbətov  oğlu Azad Hümbətovun xatirəsinə göstərilən yüksək ehtirama görə ölkə Prezidenti Ali Baş Komandan İlham Əliyevə minnətdarlığını bildirməklə bugünkü tədbirin təşkil olunmasında zəhməti olan hər kəsə təşəkkürünü ifadə etdi. 

Çıxış edən şəhid leytenant Vüsal Muradovun atası oğlunun şəxsində şəhidlərimizin xidmətlərini qiymətləndirən hər kəsə minnətdarlığını bildirməklə onların qəhrəmanlıqlarının nəticəsi kimi ölkəmizin ərazi bütövlüyünün bərpa olunduğunu xatırlatdı. Cəsarət Muradov Vüsalın şəhadətindən sonra ailəsinin yanında olan hər kəsə minnətdarlığını bildirdi.

Universitetin Sosial məsələlər və ictimaiyyətlə əlaqələr üzrə prorektoru, dosent  Elmar Xəlilov çıxışında tədbir iştirakçılarını – şəhid ailələrini, qaziləri və müharibə iştirakçılarını SDU-nun rektoru Rüfət Əzizovun adından salamladı, 44 günlük Vətən müharibəsində Ali Baş Komandan, Prezident cənab İlham Əliyevin rəhbərliyi ilə əldə olunmuş tarixi Qələbədən söz açdı. Şəhidlərin xatirəsinin əbədiləşdirilməsi məqsədilə həyata keçirilən bu cür layihələrin əhəmiyyətindən bəhs etdi, filmin yaradıcı heyətinə təşəkkürünü bildirdi. Bu istiqamətdə Sumqayıt Dövlət Universitetində vətənpərvərlik ruhunda aparılan tərbiyəvi işlərdən, şəhidlərin  gələcək nəsillərə tanıdılması ilə bağlı həyata keçirilən tədbirlərdən danışdı. Bildirdi ki, tələbə - gənclərimiz ölkə Prezidenti cənab İlham Əliyevin ətrafında sıx birləşməklə dövlətçilik ənənələrinə sədaqətin parlaq təcəssümünü nümayiş etdirirlər. Qürurverici haldır ki, al qanı ilə tarix yazan Vətən mücahidlərinin, gənclərin sırasında Sumqayıt Dövlət Universitetinin tələbə və məzunları da vardır. Elmar Xəlilov şəhidlərə Allahdan rəhmət, onların ailələrinə səbr, qazilərə şəfa dilədi.

Tədbirin sonunda Şəhid Ailələrinə Qayğı Cəmiyyətinin sədri Müşfiq Əliyev bir sıra tədbir iştirakçılarının, o cümlədən prorektor Elmar Xəlilovun birliyin döş nişanı ilə təltif olunduğunu bildirərək mükafatları təqdim etdi.