Bu gün dünya alimlərinin daha dərindən və geniş araşdırdığı bitkilərdən biri də boymadərəndir. Bitki Avropada, Amerikada, eyni zamanda, Azərbaycanda geniş yayılmışdır.
Büzücü xüsusiyyətinə görə, ondan ənənəvi olaraq, yaraların sağalması və qanaxmanı azaltmaq üçün istifadə edilmişdir. Bitkidə iltihabı azaltmağa və narahatlığı aradan qaldırmağa kömək edən antiinflamatuar birləşmələri var.
Boymadərənin tərlətmə qabiliyyəti olduğundan, qızdırmanı azaldır, soyuqdəymə və qrip əlamətlərini yüngülləşdirir. Bitkidən həzmi asanlaşdırmaq və şişkinliyi azaltmaq üçün istifadə edilir. Ondan sağlamlıq faydaları olan ətirli çay hazırlanır. Yarpaqları və çiçəkləri kulinariya otu kimi, dadı bir az acı olsa da, şəfa məqsədilə salatlarda, şorbalarda istifadə edilir.
Ənənəvi tibbdə ondan tənəffüs sağlamlığını dəstəkləmək, həmçinin qaraciyər piylənməsində və öd durğunluğunda yardımçı vasitə kimi daim istifadə edirlər.
Xalqımız bu bitkini belə tərif edib:
Boymadərən havadır,
Min bir dərdə davadır.