Hüquq və İnsan Haqları İnstitutu BMT-nin İnkişaf Proqramının dəstəyi ilə ulu öndər Heydər Əliyevin anadan olmasının 100 illiyinə həsr olunmuş “Hüquq və insan haqları virtual kitabxanası” yaradıb.
İnsan haqları sahəsində geniş tədqiqatların aparıldığı, dərs vəsaitlərinin, monoqrafiyaların yazıldığı dövrdə böyük izləyici kütləsi toplayan bu kitabxana qısa zamanda ziyalıların, hüquqşünasların, cəmiyyətin digər təbəqələrinin də diqqətini cəlb edib. Elektron kataloq davamlı olaraq zənginləşdirilir.
Hələlik kitabxanada 243 kitab və vəsait toplanıb. Onlardan 77-i məqalə, 9-u hesabat, 5-i hüquqi sənəd nümunələridir. Mənbəyə indiyədək 31 mindən çox giriş qeydə alınıb.
İnstitutdan XQ-yə bildirilib ki, ən çox yüklənən monoqrafiyanın müəllifi hüquq üzrə elmlər doktoru, professor Şəhla Səmədovadır. Onun “Cinayət hüququnun problemləri: cinayətlərin təsnifatı, cinayət məsuliyyətinin diferensiallaşdırılması və sanksiyaların qurulması” adlı monoqrafiyası sahənin mürəkkəb problemlərindən bəhs edir. Professorun müəllifi olduğu “Azərbaycan Respublikasının Cinayət hüququ” dərsliyi də ən çox izlənilən ədəbiyyat sırasındadır.
Azərbaycan Respublikası Daxili İşlər Nazirliyinin Polis Akademiyasında nəşr olunan “Kommersiya (sahibkarlıq) hüququ. Mühazirə mətnləri”, Bakı Dövlət Universiteti, Dövlət Gömrük Komitəsinin Akademiyası, Hüquq və İnsan Haqları İnstitutunun birgə ərsəyə gətirdiyi “Əməliyyat-axtarış fəaliyyətinin əsasları (elmi-nəzəri, hüquqi əsasları və təcrübi aspektləri)” və Daxili İşlər Nazirliyi Polis Akademiyasının hazırladığı “Ailə hüququ” adlı dərs vəsaitləri maraqla izlənilir.
Virtual kitabxana sayt ziyarətçilərinə hüquq və insan haqları istiqamətində xidmət etməklə yanaşı, hüquqi təbliğat və maarifləndirmə mövzularında elektron kitab mütaliəsinin populyarlaşdırılmasına da kömək edir. Virtual kitabxana hər bir vətəndaş üçün əlçatandır– keçid linki: https://lhri.az/az/library
XQ