“Bakı-xəbər” – 20

Nəşr tarixi 2003-cü il sentyabrın 4-dən başlanan “Bakı xəbər” qısa müddətdə mətbuat sıxlığında özünə yer tuta bilən və sayılıb-seçilən kütləvi informasiya vasitəsidir. Bu nəşrin gündəlik ictimai-siyasi, analitik qəzet kimi özünün 20 yaşını ilkin məramına sadiq qalan, zamanın çağırışlarına layiqli cavab verə bilən, xəbər saytları, onlayn formatı, hətta internet televiziyası olan bir media qurumuna çevrilməsi təqdirəlayiqdir.

Qeyd edək ki, təsisçisi və baş redakto­ru tanınmış ictimai-siyasi xadim, politoloq Aydın Quliyev olan “Bakı-xəbər” rəsmi şə­kildə müstəqil qəzet kimi qeydiyyata alı­nıb və tezliklə siyasi təmayülsüz müstəqil qəzet mövqeyinə yüksəlib. Bu nəşr Mət­buat Şurasının, baş redaktoru isə Mətbu­at Şurası İdarə Heyətinin üzvüdür. 

“Bakı-xəbər” hər zaman maarifçilik ənənələrini yaşatmağa çalışması, gü­nün nəbzini tutması, reallıqları, siyasi, iqtisadi, mədəniyyət yeniliklərini operativ işıqlandırması ilə seçilir. Bu gün informa­siya-kommunikasiya texnologiyalarının inkişafı ilə əlaqədar olaraq qəzet köşklə­rinin qarşısında növbələr gözə çarpmasa da, ənənəvi kağız çap mediasının tarix yazmaq, ictimai fikrə təsir etmək, olayla­rı arxivləşdirmək və 50 il, 100 il sonra da əlçatan olmaq kimi gərəkli missiyası var. Bu baxımdan gərəkli sayılan, cəmiyyət arasında müstəqil və demokratik qəzet imici daşıyan mətbu orqanlardan biri də “Bakı-xəbər”dir. Bu nəşr illərdir ki, həftə­də 5 dəfə fasiləsiz çap olunan az sayda Azərbaycan qəzetlərindən biridir. 

“Bakı-xəbər”ə ilk gündən rəhbər­lik edən Aydın Quliyev hələ bu qəzet yaranmazdan öncə müxtəlif mətbuat orqanlarında siyasi-publisustik və analitik məzmunlu məqalələrlə çıxış edib. Aydın müəllim politoloq və siyasi şərhçi kimi də tanınır. Azərbaycanda müstəqillik dövrü­nün ictimai-siyasi prosesləri barədə bir neçə kitabın və çoxsaylı analitik məqalələ­rin müəllifidir. Onun bacarıqlı rəhbərliyi ilə “Bakı-Xəbər”in redaksiyasında uzun müd­dət çalışmış çoxsaylı istedadlı jurnalistlər nəsli yetişib. Hazırda da özlərini qürurla “Bakı-Xəbər” yaradıcılıq məktəbinin yetir­mələri sayan bu yaradıcı insanlar müxtəlif media orqanlarına uğurla rəhbərlik edirlər. Qısa tarixi ərzində “Bakı-Xəbər” Azərbay­can Mətbuat Şurasının, ictimai təşkilatla­rın, QHT və siyasi partiyaların xeyli say­da mükafat və təltiflərinə layiq görülüb. 2020-ci ilin payızında böyük qələbə ilə başa çatan “Zəfər Yürüşü”nə qədər “Demokra­tiya, güclü iqtisadiyyat Dağlıq Qarabağın açarıdır” devizi ana səhifəsində epiqraf kimi başdan yazılan qəzet indi möhtərəm Prezidentimiz, müzəffər Ali baş Komanda­nımız İlham Əliyevin sərkərdəlik məharəti, rəşadətli ordumuzun qəhrəmanlığı sayə­sində azadlığına qovuşmuş əzəli torpaq­larımızın bərpasını, Qarabağda və Şərqi Zəngəzurda quruculuq işlərinə dəstək verməyi, başlıcası isə Azərbaycanın Cə­nubi Qafqazda yaratdığı yeni reallıqları qabartmağı ümdə vəzifəsi sayır. 

Yuxarıda göstərdiyimiz kimi, bir sıra keyfiyyət yenilikləri ilə xarakterizə olunan inkişaf yolu keçən “Bakı-Xəbər” qəzetinin kollektivini 20 illik yubileyi münasibətilə təbrik edir, daha böyük yaradıcılıq uğur­ları arzulayırıq. Onu da qeyd edək ki, qəzetin baş redaktoru Aydın Quliyevlə müsahibəni bu gün “YouTube” kanalında “XalqTV” vasitəsilə izləyə və yaxın günlər­də qəzetimizdə oxuya bilərsiniz.

XQ