Pensiya islahatlarına dəstək
Əmək və Əhalinin Sosial Müdafiəsi Nazirliyinin tabeliyindəki Əmək Bazarı və Sosial Müdafiə Məsələləri üzrə Milli Observatoriyanın Təlim Mərkəzində “Pensiya: müqayisəli perspektivdə metodlar və risklər” mövzusunda ikigünlük təlim keçirilib.
Avropa İttifaqı ilə Azərbaycan arasında Tərəfdaşlıq və Əməkdaşlıq Sazişi üzrə “Azərbaycanda pensiya islahatlarına dəstək – Faza 2” layihəsi çərçivəsində keçirilən təlimdə Əmək və Əhalinin Sosial Müdafiəsi, Maliyyə, İqtisadiyyat və Ədliyyə nazirliklərinin əməkdaşları, həmçinin Dövlət Sosial Müdafiə Fondu, DOST Rəqəmsal İnnovasiyalar Mərkəzinin nümayəndələri iştirak ediblər.
Təlimdə Leuven Universitetinin professoru Yves Stevens tərəfindən “Pensiyanın maliyyələşdirmə üsulları” , “Sosial təminatın modelləri və idarə edilməsi” , “Pensiya ilə bağlı risklər” mövzuları haqqında məlumatlar verilib. İştirakçıların sualları cavablandırılıb.
Sonda təlim iştirakçılarına sertifikatlar təqdim edilib.
E-xidmətlərə 10 milyondan çox müraciət edilib
Bu ilin yanvar–iyul aylarında Əmək və Əhalinin Sosial Müdafiəsi Nazirliyinin fəaliyyət sahələri üzrə elektron xidmətlərə 10 milyon 350 min müraciət qeydə alınıb. Bu barədə qurumdan verilən məlumatda deyilir.
Bildirilir ki, hazırda nazirliyin 153 xidmətinin 90 faizdən çoxu e-qaydada təqdim edilir. Həmçinin digər qurumların informasiya bazaları ilə inteqrasiya prosesi təmin olunur. Cari ilin 7 ayında nazirliyin mərkəzləşmiş informasiya sistemlərinə həmin qurumlardan daxil olan sorğu sayı 146 milyon olub.
Aldığımız məlumatda, həmçinin qeyd edilir ki, son illərin mühüm rəqəmsal sosial nailiyyətlərindən olan e-sosial internet portalından isə yanvar–iyul aylarında 4 milyon 537 min 400 dəfə istifadə olunub.
7 ayda ödənişlərin həcmi artıb
Bu ilin 7 ayında Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fondu tərəfindən 462 min nəfərə sosial müavinət, 374 min nəfərə Prezidentin aylıq təqaüdü ödənilib.
Əhaliyə sosial müavinətlər üzrə ötən ilin müvafiq dövrünə nisbətən 24 faiz çox olmaqla 578 milyon manat, Prezident təqaüdləri üzrə 21 faiz çox – 374 milyon manat ayrılıb.
Qeyd edək ki, yanvar–iyul aylarında 79 min, sosial ödənişlərin elektron təyinatına başlandığı 2019-cu ildən 508 min müavinət və təqaüd təyinatı e-sistem üzərindən proaktiv qaydada həyata keçirilib.
Zərifə HÜSEYNOVA, “Xalq qəzeti”