Muxtar Respublikanın Ekologiya və Təbii Sərvətlər Nazirliyi və Yeni Azərbaycan Partiyası Naxçıvan Muxtar Respublikası təşkilatının birgə keçirdiyi konfransda ümummilli lider Heydər Əliyevin ekoloji siyasətindən geniş söhbət açılıb.
Muxtar respublikanın ekologiya və təbii sərvətlər naziri vəzifəsini icra edən Xanlar Mustafayev bildirib ki, ulu öndərin təşəbbüsü ilə Azərbaycanda davamlı yaşıllaşdırma tədbirləri həyata keçirilib, nadir flora və fauna növlərinin qorunması, mühafizə edilməsi istiqamətində konkret dövlət siyasəti müəyyən edilib.
YAP Naxçıvan şəhər təşkilatının sədri Elman Cəfərli isə qeyd edib ki, mövcud ekoloji problemlərin sistemli həllini təmin etmək məqsədilə Prezident Heydər Əliyevin sərəncamı ilə “Azərbaycan Respublikasında ekoloji cəhətdən dayanıqlı sosial-iqtisadi inkişafa dair” və “Azərbaycan Respublikasında meşələrin bərpa edilməsi və artırılmasına dair” Milli proqramlar təsdiq olunub.
Bildirilib ki, “Heydər Əliyev İli” ilə əlaqədar Naxçıvan Muxtar Respublikasında 440,1 hektar ərazidə yaşıllaşdırma tədbirlərinin keçirilməsi nəzərdə tutulub.
Səbuhi HƏSƏNOV