Korifey jurnalist, məşhur diplomat, poliqlot, böyük azərbaycanlı Ənvər Nazim oğlu Məmmədovun 100 yaşı tamam oldu
...Onun sadəcə adını eşitmişdik. BDU-nun jurnalistika fakültəsinin qocaman müəllimlərinin dilindən. Peşəkar diplomat, tərcüməçi-jurnalist, Sovet İttifaqının tele-radio sisteminin qurucularından biri, əfsanəvi insan. Biz tələbələr görmədən-tanımadan onun adı ilə fəxr edərdik.
1923-cü il avqustun 15-də Bakıda anadan olan Ənvər Məmmədov 1950-ci ilə kimi SSRİ Xarici İşlər Nazirliyində müxtəlif vəzifələrdə çalışıb. Sonrakı altı ildə Radio Komitəsinin xaricə yayım redaksiyasının baş redaktoru olub. 1956-1959-cu illərdə SSRİ-nin Vaşinqtondakı məsləhətçi-səfiri, “SSRİ” jurnalının baş redaktoru vəzifələrində işləyib. 1959-1960-cı illərdə “Sovinformbüro” sədrinin birinci müavini, 1961-ci ildə Siyasi Xəbərlər Agentliyinin sədr müavini, 1962-ci ildən 1985-ci ilə kimi isə SSRİ Dövlət Televiziya və Radio Komitəsinin sədr müavini işləyib. Ə.Məmmədov həmin vəzifədə işlədiyi dövrdə sonradan məşhurlaşmış bəzi sovet filmlərinin, o cümlədən “Baharın on yeddi anı” və “Taleyin ironiyası və ya həmişə təmizlikdə" filmlərinin ekrana buraxılmasına nail olub.
İkinci Dünya müharibəsinin iştirakçısı olan Ə.Məmmədov faşist canilərinin Nürnberq Məhkəməsində Tərcümə agentliyi rəisinin müavini kimi iştirak edib. O, “intihar” xəbəri yayılmış alman generalı Fridrix Paulsu tapıb, onun gizli yollarla hərbi tribunala gətirilməsini təşkil edib. Paulsun faşistlərin törətdiyi cinayətlər barədə etiraflarını da məhz Ənvər Məmmədov tərcümə edib.
Dünən Moskvada həmkarları, dostları Ənvər müəllimin başına toplaşıb yubilyar haqqında ürək sözlərini söyləyiblər, ustad sənətkarla bağlı maraqlı xatirələrini danışıblar. Yubiley günündə tanınmış teleaparıcı Solovyev Ənvər Məmmədovun SSRİ və Rusiya televiziyasının, xəbər agentliyinin, bütövlükdə KİV-in inkişafında böyük xidmətlərini xüsusi qeyd edib.
P.S. Biz də öz növbəmizdə qəzetimizin kollektivi, eləcə də Azərbaycan jurnalistləri adından ustad sənətkarı, dəyərli həmyerlimizi 100 yaşı münasibətilə təbrik edir, Vətəndə redaksiyamızda görüşmək ümidilə ona uzun və sağlam ömür arzulayırıq.
“Xalq qəzeti”