“74-cü Bakı Beynəlxalq Astronavtika Konqresi ölkəmiz üçün qlobal baxımdan kosmos sahəsində son illərin ən prestijli tədbiridir. Azərbaycan belə bir tədbirə bu il oktyabrın 2–6-da evsahibliyi edəcək. Tədbirin yüksək səviyyədə keçirilməsi üçün dinamik hazırlıq işləri aparılır”. Bu sözlərin davamında “Azərkosmos”un ictimaiyyətlə əlaqələr və kommunikasiya qrupunun rəhbəri Fidan Behbudova bildirib:
–74-cü Beynəlxalq Astronavtika Konqresini məhz Bakıda keçirmək üçün daha öncədən biz bir sıra işlər görmüşdük. “Azərkosmos” və Beynəlxalq Astronavtika Federasiyasının tərəfdaşlığı ilə keçiriləcək 74-cü Konqres çərçivəsində konfranslar, 190-dan çox texniki sessiya və sərgilər təşkil olunacaq. Tədbirdə kosmik agentliklərin, dövlət sektorunun, investorlar və özəl kosmik şirkətlərin nümayəndələri, yerli və beynəlxalq media qurumlarının təmsilçiləri iştirak edəcəklər.
Kosmos sahəsindən olan iri şirkətlər Bakı konqresinə böyük maraq göstərirlər. Pavilyonda iştirakla bağlı artıq 50-dən çox təşkilatla müqavilə imzalanıb. Hazırda 70-dən çox ölkədən kosmik şirkətlər və nümayəndələr artıq Bakıda keçiriləcək Beynəlxalq Astronavtika Konqresində iştirak üçün qeydiyyatdan keçiblər. Konqres tarixində bu tədbirin Bakıda keçirilməsi yeni bir səhifədir. “Qlobal çağırışlar və imkanlar: kosmosa şans verək” mövzusunda baş tutacaq beynəlxalq konqres kosmik sənayenin gələcəyini formalaşdıran yeni ideyalar və qabaqcıl həllərlə bağlı fikir mübadiləsi üçün açıq platforma olacaq.
Fidan Behbudovanın sözlərinə görə, Beynəlxalq Astronavtika Konqresi özündə böyük və maraqlı konsepti birləşdirir: həm texniki sessiyalar, həm elmi məqalələr olan hissəsi, üstəlik sərgi pavilyonu. Sərgi pavilyonu biznes imkanlara yol açır. Konqresin böyük həcmli hissəsini elmi məqalələr təşkil edir. Bu il Bakı Konqresində elmi məqalələrə böyük maraq var. Ümumilikdə, 95 ölkədən 3 min 600-dək elmi məqalə Bakı Beynəlxalq Astronavtika Konqresinə qəbul olunub. Azərbaycandan isə gənc tədqiqatçı və professorların 214 məqaləsi qeydiyyatdan keçib.
Prezident İlham Əliyev bununla bağlı 74-cü Beynəlxalq Astronavtika Konqresinin 2023-cü ildə Bakı şəhərində keçirilməsi ilə bağlı Azərbaycan Respublikasına gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında sərəncam imzalayıb. 74-cü Beynəlxalq Astronavtika Konqresinin açılışında bir sıra tanınmış insanların, kosmik sahədə öz fəaliyyəti ilə məşhur insanların iştirakı gözlənilir. Bunlardan biri məşhur yazıçı, tarixçi, professor Yuval Noah Hararidir.
Könüllülərlə xüsusi hazırlıqlar aparıldığını diqqətə çatdıran F.Behbudova deyib ki, bu ilin iyun ayında könüllülərin seçimi aparıldı və müəyyən bir qrup gənc seçilib. Konqres müddətində könüllülər çox dəyərli təcrübə qazanacaqlar. Çünki Beynəlxalq Astronavtika Konqresi 50 ildən sonra yenidən Bakıda keçiriləcək. Paytaxtımız 50 il sonra yenidən bu əlamətdar tədbirə evsahibliyi edəcək.
“Xalq qəzeti”