Böyük Qayıdışın növbəti mərhələsi çərçivəsində dünən Bakı şəhərindən Zəngilan rayonunun Ağalı kəndinə köçürülən 106 nəfərdən ibarət 22 ailə Ağalı kəndində qəbul edilib.
Doğma yurda qayıdanları Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Azərbaycan Respublikası Prezidentinin Xüsusi Nümayəndəliyinin əməkdaşları “Ağıllı kənd”də qarşılayıblar. Sonra Ağalı sakinlərinin ailə başçılarına evlərinin açarları təqdim edilib.
Böyük Qayıdış layihəsi çərçivəsində bu günədək Zəngilan rayonunun Ağalı kəndinə ümumilikdə 526 nəfərdən ibarət 108 ailə köçürülüb. Köçürülən keçmiş məcburi köçkünlərin böyük qismi əsasən daha ağır şəraitdə yaşayan vətəndaşlardır. Köçürülən ailələri müvafiq qurumlar peşə ixtisaslarına və bacarıqlarına uyğun şəkildə işlə təmin ediləcək. Onlar müxtəlif dövlət qurumlarında, ictimai iaşə obyektlərində, tikinti şirkətlərində, tikiş fabrikində və digər yerlərdə çalışacaqlar.
Köçürülmüş əhali üçün bütün infrastruktur şərait - dövlət xidmətləri mərkəzi, məktəb, bağça, bank, poçt, ictimai iaşə obyektləri və sair imkanlar mövcuddur.
Ağalıya qayıdan kənd sakini İlqar Məmmədov sevincini belə ifadə edib:
– Ağalıdan getməyimizi acı, ağrılı duyğularla xatırlayıram, o zaman mənim 6 yaşım var idi. Prezident İlham Əliyevin, Azərbaycan Ordusunun sayəsində bu gün doğulub boya-başa çatdığım yurduma qayıdıram. İndi çox fərəhli bir gündür. Çünki böyük sevinc hissi ilə doğma yurdumuza qayıdırıq.
Heyran Məmmədova həsrətinə son qoyulan məqamda söyləyib:
– Çox sevinirəm ki, bu gün igidlərimizin, şəhidlərimizin sayəsində öz el-obamıza – Ağalıya qayıtdıq. Xatırlayıram ki, mən kənddən çıxanda 30 yaşım var idi. Hazırda 60 yaşındayam. Ağalıdan gələndə yoldaşımla gəlmişdim, bu gün isə övladlarımla qayıdıram. İnanırıq ki, hər şey yaxşı olacaq.
Döğma yurda dönən Raya Məmmədova isə məmnunluqla bildirib:
– Erməni təcavüzü nəticəsində torpaqlarımızdan göz yaşı ilə ayrılmışdıq. Bu gün isə vətənpərvərlik ruhunda böyüdülmüş şəhidlərimizin qanı-canı bahasına, rəşadətli və müzəffər Ordumuzun cəsarəti sayəsində azad etdikləri torpaqlarımıza qayıdırıq. Buna görə Prezident İlham Əliyevə və Ordumuza borcluyuq.
“Xalq qəzeti”