70 şəxs ödənişli ictimai işlə təmin edilib
DOST İş Mərkəzi Naxçıvan Muxtar Respublikasında (MR) daha 70 şəxs haqqı ödənilən ictimai işlə təmin edib.
Muxtar respublikada “İşsizin dostu” proqramı çərçivəsində son 2 ayda ödənişli ictimai işlə təmin edilən şəxslərin sayı 370-ə çatıb. Bununla bağlı DOST İş Mərkəzi ilə Culfa, Ordubad, Şərur, Şahbuz, Babək, Kəngərli rayon icra hakimiyyətləri və Naxçıvan MR-in kənd təsərrüfatı, ekologiya və təbii sərvətlər nazirlikləri, Meliorasiya və Su Təsərrüfatı ASC arasında sazişlər imzalanıb.
Sazişlər əsasında işə götürülən hər kəslə əmək müqaviləsi bağlanıb ki, bu da onların gələcək sosial təminat hüquqlarına əsas yaradır.
Proqrama cəlb olunan, ilkin peşə hazırlığı olmayan şəxslər müxtəlif fəaliyyət sahələri üzrə işlə təmin edilməklə həmin sahələrə aid ilkin peşə bacarıqları əldə etmək imkanı qazanıblar.
Səbuhi HƏSƏNOV, “Xalq qəzeti”
.jpg)
