Bu tənzimləmə iqtisadi stimulları da gücləndirəcək
Tarif (qiymət) Şurasının iclasında dövlətin sosial siyasətinə uyğun olaraq, tariflər tənzimlənərkən sosialyönümlülük nəzərə alınıb, iqtisadi əlverişlilik və xidmət səviyyəsinin yaxşılaşdırılması kimi amillər əsas götürülüb. Tənzimləmələrdə əsas istiqamətlər sırasında isə şəhid ailəsi üzvlərinin, hərbi əməliyyatlar nəticəsində əlil olan hərbi qulluqçu və mülki şəxslərin daşınmaz əmlaklarına hesablanan xidmət haqqına 50 faiz güzəşt tətbiq edilib. İşğalçıdan təmizlənən ərazilərdə yerləşən daşınmaz əmlak obyektləri üzrə xidmət haqqına da eyni faizli güzəşt tətbiq olunub.
Sahibkarlığa dəstək və biznes mühitinin inkişafı tədbirləri çərçivəsində edilən güzəştlər çərçivəsində isə sənaye, nəqliyyat, rabitə, müdafiə və digər təyinatlı torpaqlar üzrə tariflərdə 75-86 faiz azalma tətbiq edilib. Eyni zamanda, kiçik və orta biznesin dəstəklənməsi baxımından sahəsi min kvadratmetrə qədər olan əmlakların tarifləri azaldılıb. İqtisadi fəaliyyətin canlanmasına da əlavə stimul yaradılıb. Belə ki, yeni tariflərə uyğun olaraq, qeyri-yaşayış sahələri üzrə xidmətlərdə xərclər orta hesabla 5,2, aqrar sahənin dəstəklənməsi məqsədilə kənd təsərrüfatı təyinatlı torpaqlar üzrə tariflər isə orta hesabla 73 faiz aşağı salınıb.
Beləliklə:
– kənd təsərrüfatı təyinatlı torpaqların qeydiyyat tarifləri sahə 5 hektaradək olduqda 100 manat, 5 hektardan çox olduqda, hər əlavə 1 hektar üçün əlavə olaraq 10 manat təşkil edir;
– sahibkarlığa dəstək və biznes mühitinin inkişafı məqsədilə sənaye sahələri 1 hektaradək olduqda 500 manat, 1 hektardan çox olduqda, hər əlavə 1 hektar üçün əlavə olaraq 100 manat xidmət haqqı hesablanır;
– kiçik və orta biznesin stimullaşdırılması üçün min kvadratmetrə qədər olan qeyri-yaşayış sahələri üzrə (bina, tikili, qurğular və onların tərkib hissələri) tariflərdə əmlakın yerindən və sahəsindən asılı olaraq 1-8 faiz azalma tətbiq edilir.
İstər sahibkarlığın, istərsə də aqrar sektorun dəstəklənməsi məqsədilə müvafiq tarif qiymətlərinin azaldıması bu sahələrdə biznesin qurulması və inkişafına, innovativ ideyaların reallaşdırılmasına xidmət edir. Xatırladaq ki, respublikamızda mikro, kiçik və orta sahibkarlıqda idarəçiliyin müasir tələblərə uyğunlaşdırılması, kiçik və orta biznesin inkişafının dəstəklənməsi, eyni zamanda, bu sahələrin ölkə iqtisadiyyatında rolunun artırılması dövlət başçısı tərəfindən hazırda qarşıya qoyulan prioritet vəzifələrdir.
Bəli, bu gün respublikada mikro, kiçik və orta sahibkarlıq subyektlərinin yaradılması və inkişafına xüsusi diqqət yetirilir. Bu məsələ iqtisadiyyatın tərəqqisində, şaxələnməsində mühüm istiqamət hesab edilir və bu sahənin dayanıqlı və davamlı inkişafa, məşğulluğun təmin edilməsinə, yoxsulluğun azaldılmasına, sahibkarlığın və innovasiyaların stimullaşdırılmasına verdiyi töhfə yüksək dəyərləndirilir.
“Azərbaycan 2030: sosial-iqtisadi inkişafa dair Milli Prioritetlər” çərçivəsində hazırlanan ortamüddətli sosial-iqtisadi inkişaf strategiyasında da kiçik və orta sahibkarlığın ölkədə iqtisadi artımın və məşğulluğun əsas mənbəyinə çevrilməsi strateji hədəflərdən biri olaraq müəyyənləşdirilib.
Son illərdə ölkəmizdə kiçik və orta biznes subyektləri dövlətin geniş dəstək tədbirləri ilə əhatə olunub. Bu sektorun tənzimlənməsi, biznesə dövlət xidmətlərinin göstərilməsinin yaxşılaşdırılması, biznes maraqlarının müdafiəsi, bazarlara və maliyyəyə çıxışının yaxşılaşdırılması diqqət mərkəzində saxlanılıb və nəticədə müsbət göstəricilər əldə edilib.
Onu da qeyd edək ki, dövlətin sosial siyasətinə uyğun olaraq, qiymətlər tənzimlənərkən çoxmənzilli yaşayış binalarının inventarlaşdırılması üzrə tariflər 46-49 faiz azaldılıb. Xidmətin keyfiyyətinin və çevikliyinin artırılması üçün daşınmaz əmlakın dövlət reyestrindən məlumatların yoxlanılması və reyestrə məlumatın daxil edilməsi üzrə xidmət haqqı 30 manatdan 36 manatadək məbləğdə müəyyənləşdirilib. Ümumilikdə, daşınmaz əmlakla bağlı tariflərin sayı 79-dan 60-a endirilib. Xidmət sayının optimallaşdırılması bir sıra istiqamətlər üzrə xidmət haqqının aşağı salınmasına və ya tamamilə ləğv edilməsinə imkan yaradıb.
Tarif (qiymət) Şurası tərəfindən dövlət qeydiyyatına alınan daha 95 dərman vasitəsinin qiymətini də tənzimlənib. Belə ki, əhalinin sağlamlığı baxımından mühüm önəm daşıyan, sahibkarlar üçün idxalı iqtisadi cəhətdən səmərəli olmayan dərman vasitələri üzrə etibarlı təchizatın gerçəkləşdirilməsi məqsədilə aidiyyəti qurumların rəyi əsasında 46 dərman vasitəsinin qiyməti təsdiqlənib.
Daşınmaz əmlakın qeydiyyatı, texniki inventarlaşdırılması və kadastrı xidmətlərinin tarifləri tənzimlənərkən, müvafiq qanunvericiliyə edilən dəyişikliklər yeni xidmətlər üzrə tariflərin müəyyənləşdirilməsinə, mövcud tariflərin tənzimlənməsinə zərurət yaradıb. Bu zaman əsas məqsəd daşınmaz əmlak sahəsində idarəçilik sisteminin rəqəmsal texnologiyalar əsasında müasirləşdirilməsi, şəffaflaşdırılması, keyfiyyətli, çevik və etibarlı xidmətlərin göstərilməsi olub.
Tarif (qiymət) Şurasının iclasında xidmət tariflərinin optimallaşdırılmasına da baxılıb. Nəticədə tariflərin sayı 79-dan 60-a endirilib, xidmət sayının optimallaşdırılması bir sıra istiqamətlər üzrə xidmət haqqının aşağı salınmasına və ya tamamilə ləğv edilməsinə imkan yaradıb. Tarif (qiymət) Şurasının qərarına əsasən, qanunvericiliyə dəyişikliklər nəticəsində yaranmış yeni 9 xidmət üzrə 14 tarif müəyyənləşdirilib, 21 tarif mövcud səviyyədə saxlanılıb, 29 tarif tətbiq olunmadığı üçün ləğv edilib, 5 tarif alt qruplara keçirilərək ümumiləşdirilib.
Tarif (qiymət) Şurası tərəfindən yaşayış fondu üzrə qiymətlər də tənzimlənib. Belə ki, çoxmənzilli yaşayış binalarının inventarlaşdırılması üzrə tariflər hər bir kvadratmetr üçün çoxmənzilli binanın yerləşdiyi zonadan asılı olaraq 46-49 faiz azaldılıb. İlkin və təkrar texniki inventarlaşdırılma və sifarişlə həyata keçirilən yerquruluşu işləri üçün tarif çoxmənzilli yaşayış binalarının ümumi sahəsinin hər 1 kvadratmetr üçün 0,65 manat səviyyəsində müəyyənləşdirilib.
Mənzillər üzrə isə bu tariflər sahəsi 50 kvadratmetrədək (50 kvadratmetr daxil) olduqda Bakıda 40 manat, Abşeron, Sumqayıt və Gəncədə 35 manat, digər şəhər və rayonlarda 30 manat təşkil edir. Yaşayış fondunun sahəsi 50 kvadratmetrdən çox olduqda isə hər əlavə 1 kvadratmetr üçün anoloji olaraq 0,40, 0,32 və 0,30 manat əlavə olunur.
Tarif (qiymət) Şurası daşınmaz əmlak sahəsində göstərilən digər xidmətlər üzrə də tarifləri təsdiq edib. Bunlar torpaq tədqiqatlarının aparılması, xəritələşdirilməsi və sifarişçiyə təqdim olunması, texniki kadastr və yerquruluşu məlumatlarının və sənədlərinin (arxiv arayışları, texniki sənədlərin təsdiqlənən surəti) verilməsi, sxematik ünvan planlarının tərtibi və sairdir.
V.BAYRAMOV, “Xalq qəzeti”