Neftçala rayonunda Vətən müharibəsi qəhrəmanı şəhid Camal İsmayılovun doğum günündə şair-publisist  Elnur Uğurun onun da döyüş yolunu əks etdirdiyi "13 əfsanə" kitabının təqdimat mərasimi keçirilib.

Füzulidən–Şuşaya döyüş yolu keçmiş Xüsusi Təyinatlılar taborunun 13 əfsanəvi döyüşçüsünün qəhrəmanlığından bəhs edən nəşrin ictimaiyyətə təqdimatında rayon rəhbərliyi və ziyalıları, Qarabağ qaziləri və şəhid ailələrinin təmsilçiləri, Azərbaycan Yazıçılar birliyinin yaradıcı heyəti, jurnalistlər  iştirak ediblər. 

Kitabın müəllifi Elnur Uğur neftçalalı qəhrəmanın döyüş yolundan ətraflı söbtət açıb.  AYB-nin əməkdaşları Güləmail Muradn və Nəbi ibrahimli, şairlər  Vüsal Ağa və Vahid Aslan, digər çıxış edənlər şəhid Camal İsmayılovun da qəhrəmanlığının geniş yer aldığı  “13 əfsanə” kitabının Qarabağ müharibəsində xalqımızın qazandığı tarixi zəfərin salnamələşməsində, igid oğullarımızın hünərinin Vətən sevgisi örnəyinə çevrilməsində ciddi və təsirli mənbə olduğunu vurğulayıblar.

Sonda Neftçala Rayon İcra Hakimiyyətinin başçısı Mirhəsən Seyidov da yeni nəslin vətənpərvərlik ruhunda tərbiyəsində Qarabağ müharibəsi qəhrəmanlarının parlaq timsalının canlı nümunə olduğunu söyləyib, neftçalalıların Camal İsmayılovla öyündüklərini, onun xatirəsini əziz tutduqlarını, şəhidlərimizi daim ehtiramla yad etdiklərini bildirib.

“Xalq qəzeti”