Özünüməşğulluq proqramının məqsədi əhalinin sosial cəhətdən həssas qrupundan olan insanlara verilən müavinət və yardımların onların əmək bazarında məşğulluğunun təmin edilməsinə yönləndirilməsidir. Burada vacib nüanslardan biri də odur ki, dövlətin dəstəyi ilə əsasən sosial cəhətdən həssas şəxslərə və aztəminatlı ailələrə aktivlər ayrılır və onlar biznes mühitində daha dayanıqlı və gəlir gətirən sahələrə yönəldilir. Özünüməşğulluğun tətbiqi ilə həmin şəxslər yardım asılılığından azad olur və uzun müddət üçün ailələrinin maliyyə dayanıqlığını təmin edirlər.
Elgün Vəliyev Cəbrayıl rayonu sakinidir. O, “Məşğulluğa Dəstək Layihəsi”nin köməyi ilə kiçik biznesini qurub. Ən böyük arzularından biri Cəbrayıla köçərək öz biznesini orada davam etdirməkdir. Elgün Vəliyevin layihə çərçivəsində keçdiyi yol və Cəbrayıl rayonu ilə bağlı xatirələrini özündən dinləyək:
– Vətən müharibəsində torpaqlarımızın hər qarışı işğaldan azad edildikcə, doğma yurda dönüşün tezliklə baş tutacağına inamımız daha da artırdı. Mən 5–6 yaşımda Xudafərinin dəmir qapısında o qədər oynamışam ki. O dağın döşündən ətəyinə qədər üzüaşağı sürüşmüşük, uşaqlıq dövrümüzün bir hissəsini orada qayğısız keçirmişik. Yəni o anı elə səbirsizliklə gözləyirdim ki, desinlər: Xudafərin azad edildi!
Ali Baş Komandan tərəfindən Cəbrayılın işğaldan azad edildiyi xəbərini eşidəndə sevincimizin həddi-hüdudu yox idi. Həm ağlayır, həm gülürdük. Əsgərlərimizin Cəbrayıldan verilən reportajda “Azərbaycan Bayrağı Xudafərində dalğalanmaqdadır!” – müjdəsi bizə 30 ildə verilən ən böyük sevinc xəbəri idi.
Bu gün arzularımızın tam reallaşmasına az qalıb. Altı yaşımda çıxdığım yerə 36 yaşında qayıdıram. Oğlum 14 yaşında, ilk dəfə dədə-baba yurduna ayaq basacaq.
Məcburi köçkünlük dövründə dövlətin dəstəyini həmişə hiss etmişik. Özünüməşğulluq proqramı çərçivəsində “Məşğulluğa Dəstək Layihəsi” həyata keçiriləndə mən də müraciət edib iş yeri açmaq istədiyimi, amma, avadanlığa ehtiyacım olduğunu bildirmişdim. Dövlət Məşğulluq Agentliyinin əməkdaşları – sağ olsunlar – hər şey verdilər. Avtomobil, xalçayuma sexi açdım. Ailəmi dolandırıram. İnşallah, doğma yurda dönəndə biznesimi də özümlə aparacağam, orada işimi quracağam.
Yolun açıq olsun, Elgün! Cəbrayıl həsrəti ilə yaşayanların xoş günləri bundan sonra başlayacaq.
Zərifə BƏŞİRQIZI, “Xalq qəzeti”