Redaksiyamıza hər gün paytaxtdan və bölgələrdən müxtəlif mövzulu məktublar gəlir. Kimisi ölkədəki abadlıq-quruculuqla bağlı, kimisi də cəmiyyətdə gedən siyasi proseslərlə bağlı fikir bildirir. Bugünlərdə maraqlı bir məktub aldıq. Şəki şəhərindən təqaüdçü Əlihüseyn İsayev yazır:
“Hörmətli redaksiya, biz Şəki şəhərində yaşayan təqaüdçülər hər gün Bəxtiyar Vahabzadə adına parkın nəzdində olan çayxanada istirahət edir, dünyada gedən prosesləri öz aramızda təhlil və müzakirə edirik. Həmin müzakirələrdə biz Türkiyədə mayın 14-də 28-də keçirilən prezident seçkilərindən də danışırdıq. Yoldaşlarımızdan biri–Nüfvəli bəy seçkiləri müzakirə zamanı bildirdi ki, əgər türk xalqı Rəcəb Tayyib Ərdoğanı yenidən prezident seçərsə, mən türk bəyləri qoyan qırmızı papağı başıma qoyub ehtiramımı bildirəcəyəm. Qoy Rəcəb Tayyib Ərdoğan bilsin ki, onun alicənablığını, vətənpərvərliyini, Türkiyənin gələcəyi naminə necə çalışmasını Şəkidə də sevir və dəstəkləyirlər”.
Əlihüseyn İsayev Nütvəli bəyin qırmızı bəy papağı ilə çəkdirdiyi şəkli də göndərib və məktubunda xahiş edib ki, bu məlumatı və şəkli “Xalq qəzeti”ndə “Şəkili balası Nütvəli bəy” başlığı ilə dərc edək və qəzetin həmin nömrəsini yaşadığı – Şəki şəhəri, Ə.Məmmədov küçəsi, ev 39 ünvanına göndərək.
Əlihüseyn bəyə və onun təqaüdçü yoldaşlarına ömrün ahıl çağında cəmiyyətdəki siyasi proseslərə laqeyd olmadıqlarına, Azərbaycanın qardaşı və dostu Türkiyədə gedən seçkilərə maraq göstərdiklərinə görə təşəkkür edirik. Onlara bildiririk ki, yalnız siz yox, Azərbaycan xalqının bütün vətənpərvər övladları Vətən müharibəsində siyasi, maddi, mənəvi dəstəyini ölkəmizdən əsirgəməyən, hər an yanımızda olan Türkiyənin daha da inkişafı naminə Rəcəb Tayyib Ərdoğanın seçilməsini arzu edir və buna inanırdıq. Belə olmasaydı, Ərdoğanın seçildiyi gün paytaxt və bölgələrdə, hətta ölkə xaricində yaşayan soydaşlarımız tərəfindən çox saylı qurbanlar kəsilməz, insanlar sevincindən küçələrdə izdiham yaratmazdılar.
Sevincinizə şərikik, Şəki təqaüdçüləri!
Təqdim etdi:
Zərifə BƏŞİRQIZI, “Xalq qəzeti”
.jpg)
