Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü ilə Azərbaycan Milli Məclisinin deputatı, akademik Nizami Cəfərov Nizami adına Daşkənd Dövlət Pedaqoji Universitetində “Heydər Əliyev və Azərbaycan ədəbiyyatı” mövzusunda mühazirələr oxuyub.

Əvvəl özbək dili və ədəbiyyatı ka­fedrasında Nizami Cəfərovla görüş ke­çirilib. 

Kafedranın müdiri, filologiya üzrə fəlsəfə doktoru, dosent Firuzə Burxano­va universitet haqqında məlumat verib, qeyd edilib ki, bu ali təhsil ocağı 1937-ci ildən fəaliyyət göstərir. 1947-ci ildən isə universitet dahi Azərbaycan şairi Nizami Gəncəvinin adını daşıyır. Azərbaycan və özbək xalqlarının böyük oğlu, özbək ədəbiyyatının klassikinə çevrilmiş Maq­sud Şeyxzadə də ömrünün sonunadək bu universitetdə dərs deyib. 

Sonra Firuzə Burxanova özbək dili və ədəbiyyatı kafedrasının tarixi, elmi fəaliyyəti haqqında məlumat verib, bu­rada çalışan professor-müəllim heyəti və müasir dövrdə tələbələrin ədəbiyya­ta olan marağı haqqında söhbət açıb. 

Nizami Cəfərov Azərbaycan və öz­bək xalqlarının dost və qardaş xalqlar olduğunu qeyd edib, Özbəkistan alim­ləri ilə əməkdaşlıq edən Azərbaycanın tanınmış ədəbiyyatşünasları haqqın­da danışıb. Ulu öndər Heydər Əliyevin yaratdığı əsaslar üzərində ölkələrimiz arasında münasibətlərin yüksək səviy­yədə olduğunu vurğulayan akademik deyib ki, ötən il Azərbaycan Prezidenti İlham Əliyev Özbəkistana üç dəfə səfər edib ki, bu da əlaqələrimizin yüksək sə­viyyəsindən xəbər verir. 

Sonra Nizami Cəfərov müəllimlərin müxtəlif səpkili suallarını cavablandırıb. 

Görüşdən sonra N.Cəfərov tələbələr qarşısında Azərbaycan ədəbiyyatı ilə bağlı ilk mühazirəsini oxuyub. 

Nizami Cəfərov qəzetimizin müxbiri ilə müsahibəsində deyib: “Mühazirələri­mi ümummilli lider Heydər Əliyevin 100 illik yubileyinə həsr etdim. Azərbaycan–Özbəkistan dostluq və qardaşlığına ulu öndərin tarixi töhfələrindən xüsusi söh­bət açdım. Özbək tələbələrə Azərbay­can ədəbiyyatı tarixi haqqında ətraflı məlumat verdim, çalışdım ki, ədəbiyya­tımızın tarixi barədə tələbələrdə ümumi təsəvvür yaradım. Dədə Qorquddan Koroğluya, 20-ci əsrin əvvəllərinə qə­dər olan mərhələdə ədəbiyyatımız nələr qazanıb, bu haqda da təbii ki, söhbət açdım.

Söhbətlərimi Azərbaycan xalqı­nın tarixi, dilin tarixi, ədəbiyyatın tarixi üzərində qurdum. Mühazirələrdə Türk xalqlarının ədəbiyyat tarixi, ümumi Şərq ədəbiyyatının və ümumdünya ədəbiy­yatından qaynaqlanan ortaq dəyərlərin tarixi, ədəbiyyatı haqqında da söhbət açdım. Azərbaycan ədəbiyyatının öz­bək ədəbiyyatı ilə müqayisəsi üzərində də dayandım. Təbii ki, söhbətlərimdə müasir Azərbaycan və özbək ədəbiyya­tı üzərində də dayandım. Ümumiyyətlə, söhbətlərim maraqla dinlənildi, çoxsaylı suallara cavab verdim”. 

N.Cəfərov eyni zamanda bildirib ki, belə səfərlərin müntəzəm olaraq ke­çirilməsinin tərəfdarıyam. Azərbaycan alimlərinin Özbəkistanın ali məktəblə­rində, özbək alimlərin isə Azərbaycan universitetlərində müxtəlif mövzularda mühazirələr oxuması ancaq ümumi işin xeyrinə olar. 

Qulu KƏNGƏRLİ

Daşkənd