Vətən müharibəsində xalqımızın igid, qeyrətli oğulları erməni işğalçılarını məğlub edərək, uzun illər həsrətini çəkdiyimiz, qədəmlərimizin dəymədiyi yurdlarmızda üçrəngli Azərbaycan bayrağını sancdılar. Döyüş meydanında qazandığımız bu zəfər xalqımızın qəhrəman övladlarının qanı-canı bahasına, cəbhəyə könüllü yollanmış vətənpərvər gənclərimizin, əsgər və zabitlərimizin rəşadəti sayəsində tarixə yazıldı . 

Döyüşdə fərqlənmiş igid oğulla­rımızdan biri də düşmən tərəfindən basdırılmış minada ayağını itirmiş qazi Asim Pənah oğlu Məmmədbəyovdur. Asim 1995-ci ildə Xacmaz rayon Köhnə Xudat kəndində anadan olub. Ailədə üç uşaqdırlar və ilk övlad Asimdir. O, Qür­bət Babayev adına Köhnə Xudat kənt ümumi orta məktəbi bitirdikdən sonra 2013-cü ildə Beyləqanda müddətli hərbi xidmətə yollanmışdır. Tərxis olunduq­dan sonra 2015-ci ildə öz istəyi ilə Qu­sar rayonundakı “N” saylı hərbi hissədə mühəndis-istehkam bölüyündə manqa komandiri kimi işləmişdir. 

Aprel döyüşlərində iştirak edən Asim Cəbrayılın Lələtəpə yüksəkliyinin düşmən işğalından azad olunmasın­da yaxından iştirak etdi. Cəsurluğu ilə fərqlənən həmyerlim Asim 2020-ci il 44 günlük Vətən müharibəsində də bir çox Azərbaycan oğulları kimi, Vətənə bor­cunu yerinə yetirmək üçün can-başla öndə gedənlərdən oldu. Füzuli, Cəbra­yıl, Xocavənd uğrunda gedən döyüş­lərdə yaxından iştirak edərək böyük şücaət göstərdi və “Cəsur döyüşçü” medalı ilə təltif olundu. 

Döyüşlər zamanı o, Xocavənddə Qırmızı Bazar istiqamətində ermənilə­rin basdırdığı piyada əleyhinə minaya düşərək bir ayağını topuqdan itirmişdir. Müalicə aldıqdan sonra yenidən dö­yüşlərə qayıtmaq istəsə də, lakin icazə verilməmişdir. 

Asimlə həmsöhbət olduğum zaman onun qürurverici sözlərinin bir Azər­baycan oğlunun tükənməz vətən sev­gisindən soraq verdiyi aşkar hiss olu­nurdu. Döyüş yolundan danışan Asim “Vətənə xidmət hər bir gəncin borcudur və mən xidmətdə dözümlülük, mərdlik, möhkəmlik qazanmışam”, – dedi. Son­ra dövlətin onun kimi qazilərə qayğısın­dan razılıq etdi. Prezident təqaüdü və eyni zamanda hərbçi təqaüdü aldığını və 2021-ci ildə dövlət tərəfindən protez ayaqla təmin olduğunu bildirdi. 

Vətənimizin belə cəsur bir oğlu ilə həmsöhbət olmaqdan, sözün həqiqi mənasında, böyük qürur hissi keçir­dim. Allahdan şəhidlərimizə rəhmət, qazilərimizə şəfa diləyirəm.

Gülnar HƏSƏNOVA, Xaçmaz sakini